Home

آزربایجانن کۆر نگورنو کاراباخ حکومتک سابقہ سربراہ ارب پتی تاجر روبن وردانیان گرفتار۔ یہ اوس نگورنو کاراباخ چہ آرمینی آبادی سیتۍ آرمینیاہس کن ژلان۔ آزربایجان کس قبضس منز آمتہِ امہ علاقہ منزہ چھہ ساسہ بدۍ آرمینی نژاد لوکھ ژلان۔

سعودی عرب تہ اسراییلس درمیان تعلقات استوار کرنہ چین کوششن ہندس سلسلس منز کرِ اسراییلک کیبنٹ ممبر ھایم کاز اقوام متحدہ چہ کانفرنسہِ خاطرہ سعودی عربک دورہ۔

بییہ اکہ خبرِ مطابق کۆر سعودی عربن فلسطین خاطرہ گۄڈنیک سفیر مقرر۔

یوکرینکۍ سپیشل فورسن کۆر دعوی ز پتمہ ہفتہ کس حملس منز گیہ روس کہ بحیرہ اسود کہ سمندری فلیٹکۍ کمانڈر ایڈمرل وکٹر سوکولوف تہ تس سیتۍ 33 افسر کریمیا کس بندرگاہس منز واقع ہیڈ کوارٹرس پیٹھ یوکرینکۍ میزایلی حملس منز ہلاک۔

اکتوبر 5 پیٹھہ گژھہ آیی سی سی کرکٹ عالمی کپ شروع۔ 46 ہن دۄہن ہنز یہ دہن ٹیمن درمیان او ڈی آیی مقابلہ آرایی واتہِ نومبر 19 اند یمہ رۄہہ چیمپین ورلڈ کپ حاصل کرِ۔ ٹیم یم شرکت کرن، تم چھہِ یم ۔۔ ہندوستان، پاکستان، بنگلہ دیش، اسٹریلیا، انگلینڈ، نیدرلینڈ، ساوتھ افریقہ، افغانستان، سری لنکا تہ نیوزی لینڈ۔

فرانسکۍ میکرونن کۆر نایجر پیٹھہ پنن سفیر واپس اننس سیتۍ سیتۍ وری کس ٲخرس تام پننۍ فوجی اتہِ کڈنک اعلان

صدر میکرونن کۆر بغاوت پتہ نین فوجی حکمرانن ہنز حکومت تسلیم کرنس انکار۔ نایجرکۍ حکمران ٲسۍ فرانسیسی سفیر تہ فوجی ملکہ منزہ کڈنک مطالبہ کران۔

ناسا سپیس ایجنسی مطابق آو  سیٹھا محنت پتہ، ایسٹرویڈ بینو پیٹھہ کنین تہ گردِ پیٹھ مشتمل اکھ کیپسول چھیکرس زمینہِ پیٹھ واتناونہ۔ یہ وۆتھ آتھوارِ صبح 8:52 بجے سالٹ لیک سٹی نزدیک محکمہ دفاع کس یوٹاہ ٹیسٹ تہ ٹریننگ رینج علاقس منز۔

ڈۄڈس گٲنٹس اندر، آو کیپسول ہیلی کاپٹر کہ ذریعہ اکس عارضی صاف کمرس منز واتناونہ، ییتہِ یہ نائٹروجن چہ مسلسل سپلایی سیتۍ جڑتھ چھہ۔

بینوں پیٹھہ جمع کٔرتھ نمونہ کرن درس دنیا کین سائنسدانن سیارہ ہنز تشکیل بہتر پاٹھۍ سمجھنس منز مدد۔

آذربایجانن کٔر نسلی آرمینیایی باغی ین ہندین ٹھکانن وزملہِ ہندۍ پاٹھۍ کارروایی یتھ دہشت گردی خلاف آپریشنک ناو رنہ آو۔ یمو کۆر مطالبہ ز تم تراون ہتھیار تہ علیحدگی پسند حکومت کرن ختم۔

آرمینیایی علیحدگی پسندو کرۍ ہتھیار تراونۍ شروع، انسانی امدادک گۄڈنیک قافلہ گۆو نگورنو کاراباخس منز داخل ییلہ یمہ ہفتہ روس چہ ثالثی دوران جنگ بندی ہندِ معاہدہ پتہ آذربایجانچ جارحیت ختم کرنہ آے۔

شوکت شفا

کشیر چھیہ دنیاہ کس نقشس پیٹھ موجود شاید واحد سۄ اکھ جاے ییتہ کالہ پگاہ یہ واویلا چھہ یوان کرنہ ز نہ چھہ پرن وولے کانہہ موجود، نہ کتاب ملۍ ہینہ وولے تہ نہ تمن کتابن پیٹھ کتھ کرن وول یا تنقیدی مضمون تھرن وول فرد بشرے۔  تہ پتہ ییلہ کانہہ یہ پرنک تہ پٔرتھ پننہ مقدور مطابق سمجھتھ راے زنی کرنک اتر چھہ کران سہ چھہ پننہ رایہ پیٹھ وضاحتی تنقیدی مضمون لیکھنٲوتھ تھوکہِ پیٹھ نسریکھ کرناونہ یوان۔

یتھ کتھ منز چھہ نہ کانہہ مبالغہ ز یمن قومن ہندین تخلیق کارن عقلہِ ہند ششر ویگلیومت چھہ آسان تم تہ تہنز خۄد اعتمادی چھیہ نہ جون جولیس منز ششر ماسسک ناو بوزتھ ششر گانٹن ہندۍ پاٹھۍ ژھیہ پشن الانزۍ گژھان۔ یہ چھہ امہ مۄکھ ز جنیون تخلیق کارن ہنز وڈونۍ چھۄکھ چھیہ تنقید نگارن ہنزِ چھگہِ نش تمی آیہ  بے خوف تہ بے پروا  آسان یتھہ پاٹھۍ اسمانس منز وڈونین انزن ہنز چھۄکھ کۄکر پوتن چھگ دون واجنہِ لاشہ ہنز ژھالہِ نش۔

ویسے تخلیق کار کیاز گژھہِ تنقید نگارن کھوژن؟ تم کیاز نہ اوکن وچھان ز ساروے کھۄتہ بۆڈ تخلیق کار چھہ نہ تنقید نگارن ہند چانگڑ بوزتھ کاجۍ رنگت تھاون والۍ انسان پیدہ کرنۍ بند کران تہ نہ یتھۍ انسان پیدہ کرنہ وز اکھ وضاحتی بیان یہندس ڈیکس پیٹھ لیکتھ یا کھنتھ تھاوان۔ کیا یہ چھہ نا امہ موجوب ز یتھہ پاٹھۍ تخلیق کار تنقید نگارن ہندِ کھۄتہ واریاہ پایدان ہیۆر چھہ آسان، تتھے پاٹھۍ چھہ آسان تخلیق کار سنز تخلیق تہِ تنقید نگارن ہندِ تنقید ہیۆر۔ صرف چھہ یہ ز تخلیق کار گژھہِ تخلیق کار آسن تہ تخلیق تخلیق۔ اگر تہِ چھہ تیلہ چھہ نہ کانسہ تخلیق کارس تنقید نگارس وضاحتی بیان منگچ ضرورت۔ تہ اگر نہ تہِ چھہ تیلہ تہ چھیہ نہ وضاحتی بیان منگچ کانہہ تعجلی تکیاز زیادہ کشنہ سیتۍ چھیہ مزہ بلاے ینہ بدلہ ٲخرس پیٹھ مسلس رتھ چھولہ وسان۔

یہ چھیہ اکھ مسلمہ حقیقت ز انسانن ہنز ذہنی قوت چھیہ نہ ہشی آسان تہ نہ سونچنک، تشریح تہ تاویل کرنک طاقت۔ ییلہ کتھ یہ چھیہ تیلہ گژھہِ نہ یتھ پیٹھ ملالہ گژھن ز کانہہ کیاز نہ تہِ سورے میانۍ پاٹھۍ سمجھان تہ سران یہ بہ سوچتھ، سمجھتھ تہ سرتھ تمن برونہہ کنہ پیش کران چھس۔ اگر نہ یہ آسہے تیلہ کیاز یی ہن پیغمبر کنہِ کنہِ کڈنہ، عارف مسلہ وٲلتھ دارس کھالنہ، فلاسفر زہر قاتل چاوناونہ، ساینس دان پھیہہ کھیاونہ۔ مگر سیتی چھیہ یہ کتھ تہِ یاد تھاونۍ لایق ز تخلیق کار تہِ گژھہِ نہ یتھ برمس منز روزن ز بس چھہ سے یوت سونچہ سرایہ ہند اکلوتا صاحبِ فراست تیس مار خان۔ تکیاز پریتھ اہل علمس ہیۆر چھہ کانہہ نتہ کانہہ اہل علم ضرور آسان (کلی طور یا کم از کم کینژن معاملن منز جزوی طور)۔ اگر تخلیق کارن تہ تنقید نگارن برونہہ کنہ یہ میون وضاحتی بیان کۄکرن مختہ چھکن ثابت گژھہِ نہ، تیلہ بدلہِ غالبا کشیرِ منز تخلیقچ تہ تنقیدچ نہج اچھ ٹٹوارس منز تہ موضوع کس تہ تریٹمینٹ کس تفہیمس یی نہ بانبرہ لال لٲگتھ کتنہ تہ خلط ملط کرنہ۔  یہ کتھ وننۍ تہِ چھیہ اہم ز محبت چھہ ساروے کھۄتہ بوزمت تہ مانڈنہ آمت موضوع مگر پریتھ کانہہ چھہ اتھ پننہ پننہ آیہ لۄلہ کھۄل کران تہ لول بران تہ امہ باوجود رنیو نہ یہ رنیومت ہیو باسن وول موضوع از تام تہ نہ رنہِ قیامت کس صبحس تام۔

اشارن منز کتھ کرنہ پتہ یمہ بہ تۄہہ برونہہ کن سیدِ سیۆد پننہ دلک مدعا تہ مقصد ہیتھ۔ تہ سہ چھہ یہ ز بہ چھس دل ہندرتھ یمہ کتھہِ ہند اظہار کرن یژھان ز اکھ تنقیدی مضمون بچہ لیکھتھ تہ تتھ پیٹھ غیر معمولی رد عمل وچتھ کٔر میہ از و بعد کنہِ تہِ فن پارس پیٹھ کتھ کرنس تھۄکہِ پیٹھ نسریکھ۔ تہ اتھ سیتۍ سیتۍ چھس بہ تۄہہ یہ گوش گزار تہِ کرن یژھان ز از تام چھہ میہ برابر ساسہِ پھرِ یہ تھۄکہِ پیٹھ نسریکھ کرمژ، تہ یوتامتھ زندگانی ساتھ دیہ تہ توبکۍ دروازہ یلہ روزن، توتامتھ روزہ بہ نسریکھہِ پیٹھ نسریکھ تہ توبس پیٹھ توبہ کران تہ کلمہ استغفار تہِ پران۔

ہندوستانن زیون آسٹریلیاہس سیتۍ سپدن والین ترین او ڈی آی میچن ہندس گۄڈنکس میچس منز پانژو وکٹو سیتۍ۔ آسٹریلیاہن کرِ ۲۷۶ رنہ، ہندوستانن کرِ پانژن وکٹن پیٹھ ۲۸۱ رنہ۔