ڈھاے آلو باپتھ آلو ڈاے
شوکت شفا
نذیر جہانگیر صابنۍ افسانہ سۄنبرن "ڈھاے آلو "پٔرتھ سپدۍ لطف اندوز تہِ تہ کینژو چیزو نش زانۍ یاب تہِ۔ موجودہ تیز رفتار دورکین تقاضن پیٹھ چھہ امہ کتابہِ ہند وزن تہِ وتران تہ حجم تہِ: ہلکہ پھلکہ تہ مختصر کتابہِ ہنا۔ کتاب وچھتھ چھہ باس لگان ز سارے کتاب ہیکہ ہون اکہ افسانکۍ پاٹھۍ اکۍ سے مجلسہِ منز مۄکلاوتھ۔ اگرچہ تہِ چھہ نہ پتہ ممکن سپدان مگر یہ باسُن چھہ پرن والس کتاب پرنس کن مٲل پھرنس منز اہم کردار ادا کران۔
کتاب چھیہ کل بل اکس ہتس تہ دہن (110) صفحن پیٹھ مشتمل۔ مصنف سند پانہ لیۆکھمت پیش لفظ تہ ساری افسانہ چھہِ کل بل نمتن (90) صفحن پیٹھ پھہلتھ۔ باقی ین ہندۍ تاثرات یم وہن (20) صفحن پیٹھ پھہلتھ چھہِ اگر اۆک طرف تراوو تیلہ چھہ مصنف سند کنٹربیوشن یا تخلیق کار سندۍ آلو کتابہِ منز قریبا ڈھاے حصہ روزان؛ تہ اتھ چھہ کتابہِ ہندس عنوانس سیتۍ سیٹھاہ مناسبت۔
اتھ کتابہِ کیاز چھہ ڈھاے آلو ناو آمت تھاونہ، مصنف چھہ تتھ اکس فرضی مخلوق ” واے وۄپھس” سیتۍ جوڑان۔ واے وۄپھس چھہِ کاشرس منز ” یچھ” ونان۔ واے وۄپھ چھہ نہ اسم یا ناوت بلکہ آلوچ اکھ شبیہہ۔ اتھ وضاحت کرنۍ باسیوم ضروری تکیاز مصنفن چھہ واے وۄپھ بحثیت ناوت ورتومت یس میانہ حسابہ تصحیح طلب چھہ۔ پتہ گۆو ز کتابہِ گۆژھا ” ڈھائے آلو” ناو آسن کِنہ "آلو ڈھاے” چھہ بحث طلب۔ چونکہ کتابہِ ہند ناو چھہ اکس آلوس سیتۍ منسوب تہ کتاب تہِ چھیہ بذات خۄد مصنف سند اندرم آلو، لہذا چھہ باسان ز آلوے گۆژھ گۄڈہ ورتاونہ ین نہ کہ ڈھاے۔ یہ چھہ نفسیاتی ستھرس پیٹھ تہِ اہم تکیاز ییمہ چیزک گۄڈنیتھ ذکر چھہ یوان کرنہ، ذہنک توجہ چھہ جادہ پہم تکنتھے پھیران تہ سے چھہ اہمیتک حامل تہِ بنان۔ ڈھاے ہیکہِ پتہ امہ آلوکہ اختصارک ترجمان بنتھ۔
کتاب پرنہ برونہہ اوس نہ میہ باسان ز کتاب لیکھن وول آسہِ پزے یوتاہ ماہر فن۔ یہ کتاب پٔرتھ گۆو میہ یقین ز” ڈھاے آلو "کتابہِ ہند مصنف چھہ تخلیقی اندازس منز آلو دنس پیٹھ قادر تہِ تہ امہ حوالہ ماہر تہِ۔ ییلہ کُنہِ ساتہ تہِ کاشرین جان تہ زبر افسانہ سۄمبرنن ہند ناو یی ہینہ، ییمہ کتاب ہند ناو ییہ نہ شاید مشروانہ یا لژھہِ کرنہ۔
اکس جان افسانس منز تکنیکی اعتبار یم جز گژھن آسنۍ، تمن پیٹھ چھہِ کتابہِ ہندۍ ساری افسانہ وتران۔ افسانن ہنز کہانی یہ بوزتھ چھہ باس لگان ز یہ چھہ زن سورے بوزمت؛ یہ نہ کینہہ ز خدا دین نجات افسانہ چھہ سرقہ باسان بلکہ چھہِ موضوع بوزمتۍ تہ مانڈمتۍ ہی باسان۔ مگر ٹریٹمینٹ چھہ تمہ آیہ کرنہ آمت ز افسانہ پران پران تہ پٔرتھ چھہ سہ لطف تہ مزہ محسوس گژھان یس لطف تہ مزہ نۆو تہ سادروار تخلیق پرنہ وز یا پرنہ پتہ محسوس گژھان چھہ۔
افسانن ہند آغاز تہ متن چھہِ پریتھ جایہ فنکارانہ مگر اختتام چھہ کُنہِ کُنہِ جایہ توجہ طلب تہ تصحیح منگان۔ مثالے نیتون گۄڈنیکے افسانہ میتھک پیپر۔ اگر ٲخرس پیٹھ آسہے نہ وننہ آمت ز بہ اوسس فیل گومت، بلکہ آسہے وننہ آمت ز بہ اوسس تی گومت یہ میہ شک اوس یا ییہ نہ کہنی وننہ، تجسس روزہے برقرار تہ یہ ماسٹر پیس روزہے ماسٹر پیسے۔ کُنہِ کُنہِ جایہ چھہ یہ باس تہِ لگان ز افسانن ہند گۆل چھہ ہنا جلد بازی منز بند کرنہ آمت۔ پتہ گۆو یمن سارنے افسانن افسانہ ونن، تتھ چھیہ نہ آب ترنس تہِ وتھ۔ مگر یم افسانہ ہیکین نہ باقی ین زانۍ متین تہ مانۍ متین کاشرین افسانہ نگارن نش ڈھاے آلوکس افسانہ نگارس غیر معمولی پاٹھۍ کینہہ قدم برونہہ یا کینہہ پاوۍ ہیۆر تھٲوتھ۔ تخلیق کارس چھیہ صلاحیت تہِ، ہیکتھ تہِ تہ وُپھ تہِ ز سہ ہیکہ واریاہ برونہہ ژٔلتھ یا واریاہ ہیۆر آسمان کنتھ کھٔستھ مگر باسان چھہ ز تس چھہ پننسے زمینس سیتۍ چپکتھ روزن پسند تہ پنن پان زیادہ تھکراونس منز چھیس نہ کُنہِ قسمچ دلچسپی۔ شاید چھہ تمیک وجہ یہ ز تس چھہ دنیا ہکہ لوہ لنگرہ کہ کینہہ نہ آسنہ کس حقیقتس پیٹھ یقین محکم تہ سہ یہ کینژھا چھہ لیکھان سہ چھہ محض ییمہ باپتھ لیکھان ز چلو لیکھو پننہ آیہ تہ پننہ باپتھ کینہہ، تہ اگر بییہ کانہہ اتھ میٲنس لیکھۍ متس کن کینہہ دلچسپی ہاوِ تتھ چھہ نہ ٹھاکھ۔ پتہ گۆو اگر نہ کانہہ دلچسپی ہاوِ تتھ پیٹھ تہِ چھیہ نہ کنہ ستھرچ زور زبردستی یا کُنہِ قسمک ملالہ بیترِ۔
