ہندوستان
رویش کمار سند این ڈی ٹی وی نشہ استعفی
(نٔو دل ۔ ۳۰ نومبر) این ڈی ٹی وی انڈیاہکۍ سینئر ایگزیکٹو ایڈیٹر رویش کمارن دیت این ڈی ٹی وی نشہ استعفی- چینل ہنزِ ریگولیٹری فائلنگ کہ اکہِ دۅہ پتہ آیہ یہ کتھ برونہہ کن۔ رویش اوس واریاہن پروگرامن ہنز میزبانی کران یمن منز چینلہِ ہندۍ فلیگ شپ ویک ڈے شو ہم لوگ، رویش کی رپورٹ، دیس کی بات تہ پرائم ٹائم شامل چھہِ۔
امہ برونہہ آو ریگولیٹری فائلنگ منز وننہ زِ امکۍ بانی پرنائے رائے تہ رادھیکا رائے دیت آر آر پی آر ہولڈنگ پرائیویٹ لمیٹڈ نشہ ڈائریکٹر عہدو نشہ استعفی۔
رویش کمار اوس ملکہ کین لوکن پیٹھ اثر انداز گژھن والین خام مسائلن ہندِ کوریج خاطرہ ماننہ یوان۔ یمن چھہ آمت رامناتھ گوئنکا ایکسیلنس ان جرنلزم تہ رامون میگسیسے ایوارڈ دنہ۔