نثری نظم تہ فیس بکۍ وۄستہ

صوفی شوکت

یمہ ساتہ بہ یم سطرہ داہ وہ لیکھان چھس میانس ذہنس منز چھہ یہ احساس ز مقالہ ساس آسن اتھ موضوعس پیٹھ لیکھنہ آمتۍ۔ ہتہ بدیو طالب علمو آسہِ اتھ موضوعس پیٹھ ایم فل تہٕ پی ایچ ڈی تہِ موکلوومت کٔرتھ۔ تیلہ کیاہ ضرورت چھیہ بیہ اتھ موضوعس پیٹھ لیکھنچ۔ ہتہ بدۍ مقالہ تہ کتابہ چھیہ انٹرنیٹس پیٹھ موجود تیلہ کتھ اتھ متعلق پنن دماغ خرچاون۔ واقعہ چھہ یہ ز اسہ چھیہ کتھہ جلدی مشتھ گژھان۔ سوشل میڈیا تہِ چھہ جلد باز یعنی یہ راتھ وۆنکھ سہ چھہ از طاق نسیان سپدان۔ نتہ ٲس یہ کتھ میہ  واریاہ برونٹھ تجمز۔ بیاکھ مسلہ چھہ یہ ز کتابن تام تہِ روز نہ رسایی ز کانہہ پرِ ہا۔ یس وقت کتابن دیہ سے وقت کیاز دمو نہ ریل بناونس۔ یہ زمانہ چھہ اختصارک زمانہ، 60 سیکنڈ چھیہ ریٖل یمے 60 سیکنڈ چھہِ دلیل ثابت کرن کیت میسر۔

میہ  چھہ کنہ موضوعس پیٹھ دوبارہ لیکھن کھران مگر کینہہ دوہ برونٹھ باسیوو میہ  ز اگست 2019 پتہ گے اسۍ نسیانکۍ شکار۔ میہ  اوس واریاہ کینہہ یاد روزان مگر از چھم باسان ز میہ  چھہ سورے مشتھ گومت۔ امے مۄکھہ چھس پانس یاد پاونہ باپتھ تہِ بہ یمہ سطرہ دوبارہ لیکھان۔ امہ علاوہ اگر کانسہ دوستس مشتھ آسہِ گومت تس تہ پییہ یاد اگر پرنس فرصت آسیس۔

بہرحال اصل کتھ چھیہ میہ  نثری نظمہ متعلق کرنۍ یۄس وۄنۍ برصغیرس منز بحیثت اکھ صنف لگ بھگ قایم چھیہ گامژ۔ مگر سیتی چھہِ مغربس منز امہ صنفہ ہندۍ امکانات تہِ وارہ وارہ ختم سپدان۔ کاشرۍ ادیب تہ نقاد چھہِ ونہِ تہِ اتھ صنفہ تبراہ پران تہ پننۍ زیو میٹھراوان۔ وۄستاد چھہ حضرت علامہ سنز روایت انان، ژاٹھ چھہ سوشل میڈیا پیٹھے پننین اعلیٰ اخلاقن داد منگان تہ پانے طے کران ز کیاہ چھہ قبول کرن تہ کیاہ چھہ رد کرن۔ حالانکہ کینہہ چیز یمن پیٹھ کاشرس ادیبس یا نقادس سوچن اوس تتھ کن چھہ نہ کانہہ گژھان۔

چونکہ اختصارک چھہ زمانہ، امہ مۄکھہ چھیہ ویچھہ پوچھہ کتھہ وننہِ سہ یہ ز شعری اظہارن ہنز کانہہ تہِ صنف چھیہ پانس اندۍ اندۍ کینہہ نظریات تہ رسومات ہیتھ پرن والین ہندس دنیاہس منز قبولیت یا رد لبان۔ نظریاتن منز چھیہ تنقیدی تہ منطقی عمل کٲم کران تہ رسوماتن منز چھیہ ثقافتی عمل کٲم کران۔ گویا پریتھ صنفچ قبولیت تہ ترقی ہند دارومدار چھہ اکہ پاسہ تتھ صنفہِ پیٹھ سپدن والہِ تنقید سیتۍ آسان تہ بییکہِ طرفہ تقلیدی تہ رواجی صورتحالس پیٹھ۔ اتھ تناظرس منز یمہ ساتہ اسۍ نثری نظمہِ پیٹھ نظر تراوان چھہِ یہ صنف چھیہ زبردست تنازعس منز ہینہ آمژ۔ شمس الرحمان فاروقی صٲبن چھیہ نثری نظم صرف یہ ونتھ مسترد کرمژ ز اسہ چھیہ نہ امہ صنفہِ ہنز ضرورت مگر سیتی وۆنکھ ز کانہہ صنف اگر قایم گیہ تیلہ گژھہِ نہ منسوخ (شاید ٲسۍ امے مۄکھہ کشور ناہیدنین نظمن تعریف کرنہِ تورۍ ترۍ متۍ)۔ نثری نظمہِ ہند تنازع چھہ نہ سانہ ونہِ تہِ طے گژھان۔ یہ چھہ پزر ز اردوہس مقابلہ چھہ نہ کاشر ادبی مواد شمارسے منز تہ ونۍ کنیک تخلیق کار چھہ اردو ہیچھتھ کاشر ہیچھان امہِ مۄکھہ چھہ یہ ضروری ز اسۍ کرو نثری نظمہِ پیٹھ تہِ کتھ تکیاز واریاہ لیکھن والۍ یم خوبصورت کاشر غزل چھہِ لیکھان تم چھہِ اچانک نثری نظمہِ کُن ہیوان ین۔ نثری نظمہِ ہند تنازعہ کمہ قسمک چھہ؟ یہ زاننہ مۄکھہ پزِ اسہِ اتھ صنفہِ سیتۍ وابستہ تصوراتن سام ہینۍ۔ نثری نظمہِ پیٹھ یس تہِ تنقیدی بحث میہ نظرِ گۆو سہ چھہ نہ امہ کس شعریاتس پیٹھ سپدیومت۔ یس تہِ بحث میہ کتابن منز  انٹرنیٹس پیٹھ یا دوستن نش بوز سہ چھہ پننس اصلس منز اشتقاقی یعنی اتھ صنفہِ کیاز پیۆو ناو نثری نظم تہ اتھۍ اندۍ اندۍ آیہ امہ صنفکۍ شعریاتی اصول وضع کرنچ کوشش کرنہ۔ اتھ ناوس پیٹھ کیاز یوت بحث؟ سوال چھہ ز کنہِ صنفہِ ہندس ناوس تہ تمہ کس شعریاتس منز چھا ہمیشہ کانہہ منطقی یا لازمی واٹھ آسان؟ سوال چھہ ز ونکین کس شعری منظرنامس منز چھا لفظ غزل امہ صنفہِ ہندین تمام شعریاتی لوازماتن احاطہ کران؟ سوال چھہ یہ تہِ ز غزل چھا محض زنانن متعلق کتھ باتھ، ناول چھا محض نویرس ونان؟

ناو تھاون چھہ بقولِ ناصر عباس نیّر اکھ ثقافتی عمل یمیک مقصد صرف اجتماعی سۆتھرس پیٹھ کُنہِ چیزچ شناخت رایج کرنۍ چھیہ آسان۔ ناو چھہ نہ کُنہِ صنفہِ ہند جوہر آسان بلکہ چھہ تمہ صنفہِ ہندِ شعریاتچ علامت آسان۔ اتھ کتھہِ منز چھہ نہ کانہہ شک ز نثری نظم ناوس منز چھیہ شترگربگی تہ یہ چھہ سٲنس سوچ کس عمومی طرزس کُھر انان تہ امۍ چیزن کرۍ کینہہ صاحب اتھ ناو بدلاونس کتۍ مجبور۔ کانسہ وۆننس نثرِ لطیف، کانسہ نثم، کانسہ نظم نما وغیرہ، مگر امہ صنفہِ ہنز یۄس رسمیات چھیہ تمۍ دژ قبولیت نثری نظم ناوسے۔

کینہہ دوست یم نثری نظم لیکھان چھہ تم چھہِ دلیلہِ رنگۍ ارسطو سندۍ نظریات انان ز وزن یا آهنگ چھہ نہ شاعری ہند جز، تم دوست تہِ چھہِ پننس استدلالس منز سادہ ز ارسطو چھہ نہ کنہ جایہ ونان ز وزن تہ آهنگ چھہ شاعری کیت غیر ضروری۔ کُنہِ جایہ چھیہ یوان مولانا الطاف حسین حالی سنز سۄ متناقص کتھ استدلالہ رنگۍ پیش کرنہ یتھ منز تم ونان چھہِ ز نفس شعر چھہ نہ وزنک محتاج آسان۔

تیلہ کیاہ مسلہ چھہ ز نثری نظم چھیہ دوہہ کھۄتہ دوہہ مقبولیت پراوان؟ اگر نثری نظم نہ نثر چھہ تہ نہ نظم تیلہ کیاہ چھیہ؟ امہ سوالہ سیتۍ پیۆو میہ  ہایزن برگ تہ آینسٹاین یاد۔ یمہ ساتہ تم گاشچ ماہیت ٲسۍ دریافت کران، تم ٲسۍ نہ ہیکان یہ طے کٔرتھ ز گاش چھا پارٹکل کِنہ ویوو۔ تم گیہ مجبور وننہ خاطرہ ز اتھ چھیہ دۄشونۍ چیزن ہنز ماہیت۔ اگر نہ تہِ مانو تیلہ چھہ اسہِ گاشک انکار کرُن۔ بہرحال اسۍ ہیکو ؤنتھ ز نثری نظم چھیہ صنف ادب مگر یہ صنف چھیہ اسہِ نثر یا نظمہِ ہندیو زمرو منزہ نیبر کٔڈتھ وچھنۍ۔ امہ خاطرہ چھہِ اسۍ مجبور ز اسۍ بناوو بدل زمرہ تہ تتھۍ منز ہیمو اتھ صنفہِ سام۔ نثری نظمہِ چھہ پنن وصف تہ باقاعدہ شعریات۔ نثری نظم تہِ چھیہ باقی صنفن ہندۍ پاٹھۍ پننین پرن والین جمالیاتی مسرت بہم کران مگر امکۍ اصول چھہِ الگ۔ نثری نظمہِ ہند ساروے کھۄتہ بۆڈ اصول چھہ بیانییت۔ یہ اصول چھہ تیوتے اہم یوت غزلہِ کیت وزنک اصول چھہ۔ سادہ لفظن منز یہ ز تجربن مکمل تہ مستقیم زیو دنۍ چھیہ نثری نظمہ ہند اصل اصول۔ عام منظومن منز چھہ بیانیاتی سطحس پیٹھ جایہ جایہ خلا آسان یتھ منز خیالن ہند تسلسل تہ نحوی تسلسل پھٹان چھہ روزان مگر نثری نظمہِ منز چھہ یہ تسلسل برقرار روزان۔ اتھ ضمنس منز چھہ یوان وچھنہ ز کینژن نثری نظمن منز چھہ خلا روزان مگر عرض چھہ یہ ز تم چھیہ آسان غیر موزون آزاد نظمہ نہ ز نثری نظمہ۔ محض آہنگچ پابندی ترک کرنہ سیتۍ چھہ نہ کانہہ چیز نثری نظم بنان۔ نثری نظمہِ منز چھیہ خلاہس تہ التواہس منز فرق کرنۍ ضروری۔ یہ التوا یا توقف چھہ نہ سہل۔ اوے چھس بہ یژھان عرض کرُن ز تہذیبچ سرنۍ آگہی تھاونہ وراے، کمزور مطالعہ، مشاہدہ، تشبیہن، استعارن تہ علامژن ہند پیچیده نظام سمجھنہ وراے کینہہ سطرہ پوتس پتھ لیکھنۍ چھیہ نہ نثری نظم بلکہ اکھ جرم۔ نثری نظم چھیہ تمہ ساتہ  زایُن لبان یمہ ساتہ  تخلیقی دریاو پننۍ بنڈ چھہ ژٹان تہ یمہ ساتہ  تتھ رکاونہ باپتھ سارۍ شعری سانچہ چھہِ لۄکٹۍ باسان۔ یہ ہیکہِ سے کٔرتھ یمۍ گۄڈے شعری لوازماتن ہند دریاو پننس وچھس آسہ شروپروومت۔

وۄنۍ چھہ سوال نثری نظمہِ ہنز ضرورت کیا چھیہ۔ اظہار باپتھ اگر اسہِ نش قسم وار صنفہ چھیہ تیلہ کیاز چھہ یہ وسیلہ اختیار یوان کرنہ۔ حالانکہ میہ  گیہ نہ ونیک تام کانہہ کاشر نثری نظم درینٹھۍ مگر چونکہ اکثر دوست چھہِ اردو انگریزۍ ادب پران (کینہہ وۄستاد محض عربی) تہ یمن زبانن منز لیکھان تہِ امہ مۄکھہ باسیوو میہ ز اتھ کتھہِ کن تہِ دمو ظن۔ میہ  کۆر گۄڈے عرض ز یمہ وز کانہہ لکھارۍ کُنہِ رایج صنفہِ نش انحراف چھہ کران تتھ انحرافس پتہ کنہِ چھہ آسان تمس لکھٲرس تمہ صنفہِ ہنز سرنۍ آگہی یمہ نش سہ لۆب چھہ ہیوان۔ صنفہِ ہنز آگہی کیاہ گیہ؟ یہ چھیہ نہ محض فنی سطحچ آگہی آسان بلکہ آگہی تتھ صنفہِ سیتۍ جڑتھ قدرن ہنز، تمہ چین فکری تہ تہذیبی بنیادن ہنز۔ سطحی طور چھہ اسہِ باسان ز شاید چھہ یہ انحراف کرن وول لکھارۍ کیاہ تام نۆو چیز ہیتھ بازر درامت مگر واقعہ چھہ یہ ز یہ باغی لکھارۍ چھہ پۆت کال چین قدرن ہند خام مواد ہیتھ برونٹھ پکان۔ یہ لکھارۍ چھہ ہیت تہ بیان کس سطحس تام بغاوت کران مگر تہذیبی قدرن ہندۍ مول چھہِ تیتۍ سرنۍ آسان ز یہ لکھارۍ چھہ نہ ہیکان یمو قدرو نش دامن کش گژھتھ۔ اتھ پتہ کنہِ چھیہ زبان تہ تاریخک جبر تہِ کینژھا کأم کران۔ بیاکھ کتھ یہ ز انسانی تاریخک چھہ نہ کانہہ دور تیتھ ز یتھ منز فکرِ ہند یا فنک تصور جامد صورتس منز آسہِ برونٹھ پۆکمت۔ یہ ہیکہِ تیلی سپدتھ ییلہ وقت جامد سپدِ یا ذہن تراوِ کأم کرن۔ کُس کرِ انکار ز فی زمانہ چھہ قدرن ہندِ شکست و ریختک عمل جاری روزان۔ پۆت کال کہ تہذیبی روایتک خام مال بروے کار انتھ نوِ قدرہ متعین کرنہِ چھیہ انسانی جبلت۔ اگر نہ یہ سپدِ تیلہ چھہ زانن ز انسانن ہند سہ معاشرہ چھہ مرده۔ اگر اسۍ پننہ شاعری ہندس تاریخس کن تہِ سرسری نظر تراوو اسہِ تہِ چھہ واکھہ پیٹھہ وژن ، وژنہ پیٹھہ غزل، غزلہ پیٹھہ نظمہِ ہند سفر درینٹھۍ گژھان۔ میہ  چھیہ نہ خبر ز کاشرِ شاعری منز کر ژاو عربی فارسی اردو عروض۔ مگر میہ  چھیہ خبر ز امۍ علمن کتھہِ کنۍ کٔر سانہِ شاعری (خاص کٔرتھ غزل) ہنز تنظیم۔ امہ علاوہ ہیۆک نہ وژن یا بییہ کانہہ شعری ہیت شاید نوِس دورس منز تخلیقی تہ فکری تقاضن ہند بار ویترتھ۔ چنانچہ نادم ، کامل یا راہی ہوین تخلیق کارن پییہ پننین وجدانی ضرورتن خاطرہ بدل وتھ ژھانڈنۍ۔ تمہ پتے لۆب کشیرِ منز نظمن ہندۍ اکۍ مظبوط سلسلن جہار۔ یہ اوس سہ تخلیقی وفور یتھ برونٹھہ کنہِ تمام روایتی شعری سانچہ لۄکٹۍ پییہ۔ میہ  چھہ نہ تران فکرِ ز تخلیقیتس کیاز چھہ اسۍ جواز ژھانڈان۔ اگر اسۍ نثری نظمہِ جواز چھہِ ژھانڈان تیلہ پزِ اسہِ بذات خۄد تخلیقسے جواز ژھانڈن۔ بقول شمیم حنفی، “کانہہ تہِ نۆو اسلوب ژھانڈن چھہ دراصل یہ ز لکھارۍ چھہ پننہ داخلی زندگی نوِ سرہ نٔوِس سطحس پیٹھ سرن یژھان۔ امۍ سندس وجدانس منز چھیہ تیژ لچک آسان ز سہ چھہ مانڈنہ آمژن وتن نش گریز یژھان۔ امۍ سندِ تخلیقیتک عمل چھہ خود سر آسان ز اظہار کین نامانوس وسیلن چھہ نہ اتھہ لاگنس کھوژان”

یہ زن میہ  گۄڈے عرض کۆر ز میہ  گیہ نہ کانہہ کاشر نثری نظم درینٹھۍ مگر اگر کانہہ جسارت کرِ سۄ پزِ اسہِ کشادہ قلبی سان قبول کرنۍ۔ تتھ چھہ اکھ وجہ یہ ز نثری نظم چھیہ وۄنۍ تمام تنازعو باوجود بحیثت صنف قایم سپزمژ۔ بیاکھ یہ ز سانہ یتھ بدقسمت زبانہِ بولانی کاتیاہ چھہِ تہ لیکھانی کاتیاہ چھہِ۔ کُنہِ تہِ قسمک ادب اگر برونٹھ کن ییہ غنیمت چھہ۔