نسریکھہِ پیٹھ نسریکھ، توبس پیٹھ توبہ، تہ کلمہ استغفار
شوکت شفا
کشیر چھیہ دنیاہ کس نقشس پیٹھ موجود شاید واحد سۄ اکھ جاے ییتہ کالہ پگاہ یہ واویلا چھہ یوان کرنہ ز نہ چھہ پرن وولے کانہہ موجود، نہ کتاب ملۍ ہینہ وولے تہ نہ تمن کتابن پیٹھ کتھ کرن وول یا تنقیدی مضمون تھرن وول فرد بشرے۔ تہ پتہ ییلہ کانہہ یہ پرنک تہ پٔرتھ پننہ مقدور مطابق سمجھتھ راے زنی کرنک اتر چھہ کران سہ چھہ پننہ رایہ پیٹھ وضاحتی تنقیدی مضمون لیکھنٲوتھ تھوکہِ پیٹھ نسریکھ کرناونہ یوان۔
یتھ کتھ منز چھہ نہ کانہہ مبالغہ ز یمن قومن ہندین تخلیق کارن عقلہِ ہند ششر ویگلیومت چھہ آسان تم تہ تہنز خۄد اعتمادی چھیہ نہ جون جولیس منز ششر ماسسک ناو بوزتھ ششر گانٹن ہندۍ پاٹھۍ ژھیہ پشن الانزۍ گژھان۔ یہ چھہ امہ مۄکھ ز جنیون تخلیق کارن ہنز وڈونۍ چھۄکھ چھیہ تنقید نگارن ہنزِ چھگہِ نش تمی آیہ بے خوف تہ بے پروا آسان یتھہ پاٹھۍ اسمانس منز وڈونین انزن ہنز چھۄکھ کۄکر پوتن چھگ دون واجنہِ لاشہ ہنز ژھالہِ نش۔
ویسے تخلیق کار کیاز گژھہِ تنقید نگارن کھوژن؟ تم کیاز نہ اوکن وچھان ز ساروے کھۄتہ بۆڈ تخلیق کار چھہ نہ تنقید نگارن ہند چانگڑ بوزتھ کاجۍ رنگت تھاون والۍ انسان پیدہ کرنۍ بند کران تہ نہ یتھۍ انسان پیدہ کرنہ وز اکھ وضاحتی بیان یہندس ڈیکس پیٹھ لیکتھ یا کھنتھ تھاوان۔ کیا یہ چھہ نا امہ موجوب ز یتھہ پاٹھۍ تخلیق کار تنقید نگارن ہندِ کھۄتہ واریاہ پایدان ہیۆر چھہ آسان، تتھے پاٹھۍ چھہ آسان تخلیق کار سنز تخلیق تہِ تنقید نگارن ہندِ تنقید ہیۆر۔ صرف چھہ یہ ز تخلیق کار گژھہِ تخلیق کار آسن تہ تخلیق تخلیق۔ اگر تہِ چھہ تیلہ چھہ نہ کانسہ تخلیق کارس تنقید نگارس وضاحتی بیان منگچ ضرورت۔ تہ اگر نہ تہِ چھہ تیلہ تہ چھیہ نہ وضاحتی بیان منگچ کانہہ تعجلی تکیاز زیادہ کشنہ سیتۍ چھیہ مزہ بلاے ینہ بدلہ ٲخرس پیٹھ مسلس رتھ چھولہ وسان۔
یہ چھیہ اکھ مسلمہ حقیقت ز انسانن ہنز ذہنی قوت چھیہ نہ ہشی آسان تہ نہ سونچنک، تشریح تہ تاویل کرنک طاقت۔ ییلہ کتھ یہ چھیہ تیلہ گژھہِ نہ یتھ پیٹھ ملالہ گژھن ز کانہہ کیاز نہ تہِ سورے میانۍ پاٹھۍ سمجھان تہ سران یہ بہ سوچتھ، سمجھتھ تہ سرتھ تمن برونہہ کنہ پیش کران چھس۔ اگر نہ یہ آسہے تیلہ کیاز یی ہن پیغمبر کنہِ کنہِ کڈنہ، عارف مسلہ وٲلتھ دارس کھالنہ، فلاسفر زہر قاتل چاوناونہ، ساینس دان پھیہہ کھیاونہ۔ مگر سیتی چھیہ یہ کتھ تہِ یاد تھاونۍ لایق ز تخلیق کار تہِ گژھہِ نہ یتھ برمس منز روزن ز بس چھہ سے یوت سونچہ سرایہ ہند اکلوتا صاحبِ فراست تیس مار خان۔ تکیاز پریتھ اہل علمس ہیۆر چھہ کانہہ نتہ کانہہ اہل علم ضرور آسان (کلی طور یا کم از کم کینژن معاملن منز جزوی طور)۔ اگر تخلیق کارن تہ تنقید نگارن برونہہ کنہ یہ میون وضاحتی بیان کۄکرن مختہ چھکن ثابت گژھہِ نہ، تیلہ بدلہِ غالبا کشیرِ منز تخلیقچ تہ تنقیدچ نہج اچھ ٹٹوارس منز تہ موضوع کس تہ تریٹمینٹ کس تفہیمس یی نہ بانبرہ لال لٲگتھ کتنہ تہ خلط ملط کرنہ۔ یہ کتھ وننۍ تہِ چھیہ اہم ز محبت چھہ ساروے کھۄتہ بوزمت تہ مانڈنہ آمت موضوع مگر پریتھ کانہہ چھہ اتھ پننہ پننہ آیہ لۄلہ کھۄل کران تہ لول بران تہ امہ باوجود رنیو نہ یہ رنیومت ہیو باسن وول موضوع از تام تہ نہ رنہِ قیامت کس صبحس تام۔
اشارن منز کتھ کرنہ پتہ یمہ بہ تۄہہ برونہہ کن سیدِ سیۆد پننہ دلک مدعا تہ مقصد ہیتھ۔ تہ سہ چھہ یہ ز بہ چھس دل ہندرتھ یمہ کتھہِ ہند اظہار کرن یژھان ز اکھ تنقیدی مضمون بچہ لیکھتھ تہ تتھ پیٹھ غیر معمولی رد عمل وچتھ کٔر میہ از و بعد کنہِ تہِ فن پارس پیٹھ کتھ کرنس تھۄکہِ پیٹھ نسریکھ۔ تہ اتھ سیتۍ سیتۍ چھس بہ تۄہہ یہ گوش گزار تہِ کرن یژھان ز از تام چھہ میہ برابر ساسہِ پھرِ یہ تھۄکہِ پیٹھ نسریکھ کرمژ، تہ یوتامتھ زندگانی ساتھ دیہ تہ توبکۍ دروازہ یلہ روزن، توتامتھ روزہ بہ نسریکھہِ پیٹھ نسریکھ تہ توبس پیٹھ توبہ کران تہ کلمہ استغفار تہِ پران۔
