یتہ چھہ نہ کانہہ نقاد، الا ماشاءاللہ

نذیر جہانگیر

تخلیق کار سندِ بابت چھہ نہ ضروری واریاہ علم آسن بلکہ بقدر ضرورت۔ تس بابت چھہ خاص عطاے خداوندی آسان ییمہ کنۍ تسند تخیل چھہ تور تام واتان یوتتھ تام عام وُپھ چھیہ نہ۔ یہ چھہ سفید ڈلوم ٹھولس اندر اژِتھ وُنِہِ نہ زامتِس پُوتِس تہِ  وچھان تہ بییہ تس بالغ کَرِتھ کوکرہ سنز بانگ تہِ  دیاوان۔ تاہم نقادس بابت چھہ سیٹھاہ علم آسن ضروری۔ تمس گژھہِ نہ صرف واریاہ مطالعہ آسن بلکہ گژھہِ تس علمی استعداد علاوہ سوچ سمجھ تہ فہم فراست تہِ سیٹھاہ آسنۍ تہ بییہ تتھ سیتی قلبی کشادگی تہِ ۔ خالی پرنُے یوت تہِ  کرِ نہ کینہہ۔ مثال چھیہ مشہور ز بادشاہن تروو پنن نیچو اکس بڈس عالمس نش علم ہیچھنہ بابت۔ پانژِ وہری اۆن عالمن شہزادہ ہیچھتھ کَرتھ واپس مالس نش تہ وۆننس، حضرت یہ ہیچھنوو میہ سہ سوروے علم یس میہ نش اوس۔ بادشہن تھٔو وٲج پننہِ موچھہ منز بند تہ پریژھن نیچوس ون سا میہ کیا چیز چھہ اتھس منز؟ شہزادن کۆر ہنا غور تہ پتہ وۆتھ مٲلِس کن، تۄہہ چھہ اتھس منز گریٹہ۔ یہ بوزتھ وچھ بادشہن خشمہ ہۆت عٲلمس کن تہ پرژھنس، یی چھتن سا ہیچھ نوومت؟ عٲلم وۆتھس، بادشاہ سلامت میہ نش یس علم اوس سہ ہیچھنوو میہ شہزادہ، مگر عقل چھیہ نہ سہ چیزا یس کانہہ کانسہ دِتھ ہیکہِ، عٲلمن ہوو شہزادس ز بادشاہس چھہ اتھس منز سہ چیز یس سٹون چھہ (stone) تہ تتھ چھہ منز باگ گۆد، وۄں چھیہ یہ عقل یۄسہ انسانس ونِہِ ز گریٹہ ہیکہ نہ اتھس وٲتِتھ، یہ ہیکہِ وٲج ٲسِتھ۔

یہ چھہ صحیح ز بہ چھسن پنن پان زبر افسانہ نگار مانان مگر میہ چھہ نہ زانہہ یہ گمانے اوسمت ز بہ کیاہ چھس نقاد تہِ ۔ یہ دعوٰی آسن چھہ نہ سہل۔ تنقید چھیہ اکھ مشکل صنف تہ نہایت سرون ادبی وصف۔ نقاد گَژھہِ کمالک نفر آسن۔ مگر وۄنۍ چھم باسان ز کاشرس منز چھہ نہ نقادے کانہہ تہ اگر رژھ کھنڈ کانہہ تنقیدی فن چھہ زانان تیلہ چھس سہ تہِ بے۔

کینژو عزیزو ٲس”ڈھاے آلو” ناوہ چہ میانہ کتابہِ پیٹھ پننۍ کنۍ رِوِو لیکھنچ کوشش کرمژ مگر تتھ اوس نہ خاص کانہہ گۄبیر تہ باس اوس لگان ز یمن عزیزن تہ دوستن چھیہ نہ تنقیدچ زیادہ مہارت۔

م ح ظفر صابن اوس کینہہ کال برونہہ نندہ ریشی (رحمت اللہ علیہ) یس پیٹھ انگریزی پاٹھۍ اکھ مضمون لیۆکھمت۔ تمو وۆن میہ اتھ پیٹھ لیکھ ژہ پننۍ راے۔ میہ لیچھ فی البدیہ پننۍ راے۔ سہ تبصرہ لیۆکھم جلدی منز، تمہ پتہ تہِ چھم باسان ییتہ کین ادیبن منز اگر کانہہ اندھوں میں کانا نقاد چھہ تیلہ چھس سہ بے۔

درحقیقت چھہ نہ ییتہ نقادے کانہہ۔ وۄں گۆو شاعری پیٹھ بوز میہ اکہ دۄہہ ریڈیو پیٹھہ مرحوم عزیزحاجنی صابن تبصرہ، سیٹھاہ معیاری اوس۔ فکشنس منز یوسہ تہِ تنقید لیچھکھ سۄ چھیہ شُرل۔

میانہ “ڈھاے آلو” کتابہِ پیٹھ ٲس اکۍ نوجوانن رِوِو لیکھنچ کوشش کرمژ مگر تمہ تلہ باسیوم یہ جایزہ تہِ  اوس نہ تنقیدچہ ڈنجہ پیٹھ صحیح روزتھ۔ امس صاحبس منز چھیہ ضرور باسان نقاد بننچ صلاحیت مگر برونہہ پکنہ بابت چھہ واریاہ کینہہ ہیچُھن پیوان تہ پرُن پیوان۔ معتبر نقاد بننہ بابت تہ ادبی صفن منز پنن پان مانۍ راونہ خاطرہ چھیہ واریاہ کوشش کرنۍ پیوان تہ تنقیدکۍ لوازمات تہ ضروریات ہیچھنۍ پیوان۔ قلمی استعداد آسُن گۆو الگ تہ تنقیدی مہارت آسنی گیہ الگ۔

امۍ عزیز دوستن اوس فرموومت ز ڈھاے آلوہ بدلہ گۆژھ اتھ “آلو ڈھاے” ناو آسُن۔

تمن پزِ یہ زانن ز لفظ ورتاونے چھہ رایٹر سند کمال آسان۔ اکس لفظس کُنہ بییس لفظس سیتۍ گنڈ کرنس یا اکھ لفظ بییس لفظس برونہہ یا پتہ تھونہ سیتۍ چھہ معنی یس تلک پیٹھ تہِ ہیکان گژِتھ، تتھے کنۍ یتھہ کنۍ اگر صفر کنہِ ہندسس دچھنۍ کنۍ تھاوون تتھ ہندسس چھیہ قدر تہ تعداد ہران تہ وۄں اگر یۄہے صفر کھوفری کنۍ تھاووس تمہ سیتۍ چھہ نہ ہندسس تعداد ہران بلکہ چھہ صفرس پننوے مۄل راوان۔ یتھے کنۍ چھیہ ڈھاے آلوس تہ آلو ڈھاے لفظس معنی کہ اعتبارہ زمین آسمانچ فرق۔

ییلہ نہ لیکھارس پیی ٲس ز افسانہ کیا گۆو، امچ زبان کژھ چھیہ آسان، امیوک سٹائل کیتھ چھہ آسان، عام کتھن تہ افسانہ کین مکالمن تہ نریٹِوس کاژاہ فرق چھیہ پانوانۍ، افسانس منز کِتھہ کنۍ چھیہ سچویشن وۄتلاونۍ پیوان، ٹیمپو کیا گۆو، فور شیڈوینگ کتھ چھہِ ونان، ساروے کھۄتہ بٔڈ کتھ یہ ز افسانک حسن کیاہ گۆو، تہ یہ لکھارۍ کتہِ  ہیکہِ صحیح تنقیدک حق ادا کَرتھ۔ پتہ ییلہ یتھۍ سے ادیبس امۍ سنزِ کُنِہ بیقل کامِہِ پیٹھ ایوارڈ دِتکھ، پتہ ییلہ یۄہے نام نہاد ادیب باقی ین ایوارڈ دنہ بابت جج بنیوو، یہ چھہ پانسی ہوین نفرن ایوارڈک مستحق زانان۔ یتھہ کنۍ بنیوو کاشر ادب بیقلازی تہ بیقلازی لۆگ فروغ تہ ادبی معاشرے بنیوو بیقل۔

یہ چھہ از حد تہ بے حد ضروری بلکہ لازم ز ساروے برونہہ گژھہِ اکس ادیبس منز افسانک ظرف تہ ذوق پیدہ گومت آسُن تہ یۄہے چھیہ بٔڈ کوالفکیشن اکس ادیبس تہِ تہ اکس نقادس تہِ۔ اصل کتھ چھیہ یہ ز یہ چھہ نقاد تہ ادیب سند اعلیٰ ظرف تہ ذوق یس تس تعظیم تہ اعتبار کس تختس پیٹھ چھہ بیہناوان۔ وۄں گۆو ذوق تہ ظرف کِتھہ کنۍ مینو؟ اتھہ چھہ نہ کانہہ میزان یتھ پیٹھ یہ صفت تولنہ ییہ بلکہ یم اعلیٰ ذوقکی تہ تھدِ ظرفکی افراد معاشرس منز آسن تمن منز یس کانہہ اکھاہ پنن اثر بنٲوتھ ہیۆکمت آسہِ سہ ہیکون باظرف تہ باذوق مٲنتھ۔ ذوق تہ ظرف چھہِ حسنکی پاٹھۍ۔ حسنس چھیہ نہ میننہ بابت کانہہ ترکر یا میزان، کیاز یہ چھہ ذوقی۔ خوشبو چھیہ نہ تولنہ یوان، امچ میزان چھیہ حساس نس۔

حسن چھہ نہ ژورِ روزان، یہ وچھتھ چھیہ دلن منز اکھ عجیب خۄش یونۍ کیفیت وۄتلان، برابر خوشبو یکۍ پاٹھۍ، تہ انسانس چھہ حسنک احساس گژھان۔ مگر حسن گۆو نہ صرف بتھچ زبر شکل تہ زبر جسمچ بناوٹ تہ قدے یوت، یا مستک ملایم آسن تہ دند سفید مختہ دانہ ہی آسنۍ، یا بمہ تیر کمان ہشہِ تہ نس قوس قزح ہش آسنۍ، رنگ پرۆن یعنی دۄدہ آسن۔ حسنچ یہ تعریف چھیہ اڈہ لیچ۔ اگر نہ وقوف اوسس یہ جسمانی حسن چھہ سوروے وسۍ پیوان، یہ چھہ بے وقعت بنان۔ اگر نہ جسمانی جمالس سیتۍ اخلاقی حسن آسہِ تیلہ چھہ نہ یہ حسن اکمل بلکہ محض شہوت پورہ کرنک اکھ وسیلے یوت۔

لفظس چھہ اکھ کمپلکس سٹرکچر آسان۔ یہ چھہ واریہن جزیاتن ہند مرکب آسان۔ پتہ ییلہ یہ استعمال کرون یہ چھہ تمہ وِزِ اکھ تناظر منگان تہ تناظر چھہ اتھ واریاہ ڈایمینشن تہ شیڈ دوان۔

یتھے کنۍ چھہ افسانہ تہِ۔ اتھ چھیہ پننہ خصوصیتہ آسان۔ افسانہ چھہ نہ ز کتھاہ تج تہ ونۍ، کانہہ ٹراہ سونچ تہ لیۆکھ، کینہہ گُزریو پانس پیٹھ تہ وۆن یا کانہہ دلیلا بوز تہ بٲو۔ نہ حض، یہ نہ حض چھہ نہ تیوت سہل یوت کاشریو زون تہ لیۆککھ تہ پتہ باسیوکھ پانسی ز اسہِ کۆر طرہ!

حق چھہ یہ ز یتہ حض تۆگ محض کژن تام نفرنے افسانہ لیکھن، یم اونگجہ ٹینڈین پیٹھ گنزرنہ ین۔ افسانک بیان گژھہِ پرن والس وۄٹہ تلناون۔ سہ گژھہِ ونن یہ نے چھہ نہ گژھانے، مگر یی ہے چھہ گژھان!! تھیم کینہہ تہِ ٲسۍ تن مگر امہ کہ بیانچ ترتیب تہ سٹایل گژھہِ پرن والس لطف دین۔

بہرحال، اکۍ عزیز نوجوانن لیۆکھ میانہِ “ڈھاے آلو” کتابہِ پیٹھ، ز صحیح ٹایٹل ہیکہ ہے اتھ “آلو ڈاے” ٲستھ۔ امس صاحبس چھہ نہ شاید پے ز ڈھاے آلون چھہ الگ معنی تہ آلو ڈھاین چھہ بیاکھ معنی۔ ڈھاے آلو گیہ محض زہ تہ اۆڈ آلو یعنی نامکمل تریہ، ییلہ زن آلو ڈھایس چھیہ محاورچ حیثیت۔ “آلو ڈھاے”، اتھ منز چھہ طنز بذاتی یعنی ویپتھ۔ یتھ صفت، داخلی یا مزاجی معنی تہِ ونو۔ یعنی “آلو ڈھاے” بنہِ تیتھے محاورہ یتھ “حرف ڈھاے” چھہ کاشرس منز۔ یمیک معنی کم علمی تہ علمی استعدادچ ویژھے کس تناظرس منز ورتاونہ چھہ یوان یا امہ محاورک معنی چھہ مختصر کلام چہ علامژ رنگہ تہِ استعمال کرنہ یوان۔ ڈھاے آلو چھہ نہ محاورہ بلکہ چھہ اتھ سیتی اکھ تصوراتی مخلوقچ شبیہ تہِ وٲٹتھ تہ یہ چھہ اکہ پرانہِ تہذیبی تہ معاشرتی صورتحالچ شبیہ برونہہ کن انان۔ میانہ کتابہِ منز چھہ ڈھاے آلون محض لفظی صورت یعنی صرف ڈھاے آلو۔

پننہ کتابہِ “ڈھاے آلو” ناو تھونس منز اوس میانہ یمہ سونچک تہِ  دخل ز سوال چھہ یہ ز یہ “واے وۄپھ” مخلوق کیاز چھہ صرف ڈھاے آلو دوان تہ تریہ یا زہ کیاز نہ؟ یا اگر یہ مخلوق تصوراتی یا تخلیقی چھہ توتہ کیاز دیاو نٲو یہ تخلیق کارن صرف ڈھاے آلو، تریہ یا زہ نہ؟

یہ پتم “اۆڈ” آلو چھہ یمن ڈھاین آلون منز اکھ تخلیقی تہ تخیلی حیثیت تھوان تہ اتھۍ چھہِ درحقیقت فن تہ فنکاری ونان۔ اگر واے وۄپھ زہ یا تریہ، یا اکوے تہ یا ہتھ آلو تہ کڈان آسہ ہے، تسند آلو بنہ ہے نہ پراسرار تہ نہ تھوِ ہے تیلہ نذیر جہانگیر پننہ کتابہِ “ڈھاے آلو” ناو۔ یہ چھہ آلون ہند پتم “اۆڈ”، پیٹھہ سہ تہِ “واے۔۔۔۔۔!!!” یتھ ہتہ بدی ڈایمینشن چھہِ تہ ییمۍ نذیر جہانگیر پننہ کتابہِ “ڈھاے آلو” ناو تھونس آمادہ کۆر۔ “ڈھاے آلو” چھہِ بذات خۄد اکھ مکمل افسانہ تہ دنیاہک مختصر ترین افسانہ!!

بییہ چھہ بیاکھ مصیبت۔ لکھ لگۍ یتھ پتہ ز یہ چھا “ڈھاے”، کنہ “ڑھاے”، کنہ “ڈاے”، کنہ “ڑاے”؟ صحیح چھا “ڈھاے آلو” کنہ “آلو ڈھاے”؟

افسانن ہندس حسنس، ترتیبس، بیانس، جمالس، سٹایلس، تجسس، ترکیبس، کلایمکسس، جدلیاتی نقطہ نظرس، ٹریٹمنٹس، ٹکراوس، تہ خیال کس نوِرس، اورجنیلٹی، کردارن ہندین نفسیاتی پہلون، سانہ سماج کس مزاجس تہ نظامس برونہہ کنہِ اننہ کس بے شونکی اندازس، تہ افسانہ نویس سند ‘کیسرِ تلی آپ تارنچ’ کوششہ، انسانی جذبن زیو دنہ کس تجربس، تیکنیکس، بیان کرنہ کس فنس، موضوعس، یمن تمام عناصرن منز اکھ نویر انہ نس تہ کاشرس افسانہ کس خدوخالس منز جدت اننہ کین معاملن یا معاملاتن پیٹھ چھیہ نہ کانسہ کانہہ مفصل تہ دلیلن ہیند ڈکھ دتھ کانہہ کتھاہ کرمژ، تکیاز سہ استعداد یمن اوس تم چھہ یمہ دنیا درامتۍ تہ وۄنۍ چھہ نہ کانہہ یمس افسانہ کین زاوۍ جارن، نزاکتن، تہ لوازماتن ہندس تناظرس تہ پس منظرس منز میانین افسانن پیٹھ کتھ تگہ ہا کرنۍ، الا ماشاءاللہ!

بس اکہ سطحی بحثہ زیادہ چھیہ نہ کانسہ تہ وُپھ۔

“ڈھاے آلو” کتابہِ پیٹھ تنقیدس گیہ برابر میانہ کہانی “گۆبر چھہ مجرمچ” بٲش۔ “گۆبرس” ژۆٹکھ بسہِ منز سدرِ چندہ۔ بحث لۆگ یتھ پیٹھ ز چندہ ژۆٹکھاہ بلیڈہ سیتۍ کِنہ دکارِ سیتی؟ اتھۍ پیٹھ ؤژھ دۄن درین لڑاے۔ پلسہ آو تہ تمو نیو “گۆبرے” گرفتار کٔرتھ ز اصل فسادۍ ہسا چھہ یۄہے۔ پلسن وۆن ز امۍ سندۍ کنۍ ؤژھ لڑاے تہ امن گۆو خراب، اگر نہ امۍ آسہے سدرِ چندہ سونوومت تیلہ کیاہ ژٹہِ ہے چندہ ژور، تمی ژۆٹ تیلی چندہ ییلہ سدرِ چندہ اوس، نتیجہ دراو امی چندہ کنۍ ؤژھ لڑاے دۄن جماژن، چونکہ لڑاے تج چندن، چندہ اوس سدرِ تہ سَدرۍ گیہ برامد گۆبرس نش۔ لڑاے ؤژھ سدرِ کنۍ، یہ “ہتھیار” گۆو برآمد گۆبرس نش، اسلیے چھہ اصل مجرم “گۆبر”۔

یہے بٲش کٔرکھ میانین “ڈھاین آلون” تہِ۔

اکی عزیزن چھہ لیۆکھمت ز یتھین موضوعن پیٹھ چھہ برونہہ تہِ لیکھنہ آمت تہ پرن والس چھہ باسان میہ چھہِ یم افسانہ برونہہ تہِ بوزۍ متۍ مگر نذیر جہانگیرن چھہ یمن موضوعن نۆو ٹریٹمنٹ دیتمت۔

بہ چھس امس عزیزس پرژھان ز میانہِ ٹھاٹھہِ، تنقیدس منز چھیہ نہ درۄپہ کنہِ دٲرتھ دنہ یوان بلکہ چھہِ پننین دعواہن دلیلو تہ ثبوتو سیتی ڈکھ دین پیوان۔ زیادہ نہ، محض اکوے کانہہ افسانہ ہاون ژہ میہ سہ، کاشرس منزے یوت نہ بلکہ دنیاہ چہ کنہِ تہِ زبانہِ منز یس “گۆبر چھہ مجرم”، “مسلہ”، میتھک پیپر، بھاے لالہ پیوم یاد، میانی ڈرامہ سلطنت، ڈرامہ “بہتے جسم”، افسانہ بلاعنوان ہیو لیکھنہ آسہ آمت۔

“سٹوری سٹار” چھیہ اکھ امریکی ویب سایٹ یتھ پیٹھ سٹوری چھپان چھیہ۔ یۄسہ اتھ ویب سایٹہ مالک چھیہ تمہ بنوو ٹیم تہ تمہ جیوری ژارِ دنیا کیو پانژو ساسو رایٹرن ہنزو باہو ساسو کہانی یو منزہ صرف 70 کہانی تہ یمن ستتھن افسانن پیٹھ چھپٲوکھ Brightest Stars ناوہ اینتھولوجی تہ اتھ منز چھیہ میانۍ سٹوری 7 (ستمس) نمبرس پیٹھ۔ بہ چھس نہ کانہہ طرم خان بلکہ اکھ عام انسان تہ حقیر مۄہنیو مگر پانس متعلق چھہ میہ یہ گمان ز بہ چھس اللہ تعالٰی سندِ فضل وکرم سیتی زبر کہانی لیکھان تہ بییہ یتہ ونان ز یتہ چھہ نہ کانہہ نقاد، الا ماشاءاللہ