نتہ چھیہ خبر ز پریتھ مشاعرہ آسہِ اڈلیوک مشاعرہ۔
صوفی شوکت
کُنہِ کُنہِ ساتہ چھہ باسان زن چھہِ اسۍ افلاطون سنزِ گوپھہِ منز بہتھ پننین ژھاین عمراتو پیٹھہ گاران تہ یمنے ژھاین خارجی کیو باطنی حقیقت مٲنتھ پننہ جایہ خۄش باش پانے پانس طے زمان تہ طے مکان مٲنتھ پانس تسلی دوان۔ ژھاین ہند یہ دنیا چھہ سانہِ باپتھ تیوت مکمل تہ مقدس ز اتھ منز چھہ کنہِ تہِ نوینہ امکانک تصور تام جرم عظیم۔ یہ ذہنی کیفیت تہ امہ قسمک نقطہ نظر کِتھہ کنہِ چھہ اسہ تمہ لامحدود دنیاہ نشہ لۆب ہیاوناوان یس فقط امکانن پیٹھ درتھ چھہ۔ حالانکہ ازۍ کس وقتس منز چھیہ یہ کتھ فکرِ ہندین واریاہن شعبن متعلق پۆز مگر بہ چھس ادبک ادنیٰ طالب علم امہ مۄکھہ تھاوہ پننۍ کتھ ادبسے تام محدود۔
بہ ییمہ لامحدود دنیاہچ کتھ چھس کران سہ چھہ ادبک دنیاہ۔ لامحدود امکانن ہند دنیاہ۔ اصولچ کتھ چھیہ یہ ز اگر نہ گۄپھہِ منز نیرتھ ژھاین ہند دنیاہ پتھ تراوون امکانات کِتھہ کنۍ کڈوکھ بدِ۔ شاید چھیہ یہے اصولچ کتھ منیب الرحمان صٲبنہ نفسیاتک پے دوان تہ یہے سوچتھ پییہ میہ یہ اصولچ کتھ تہِ یاد۔ شوق ہیکو نہ ونتھ بلکہ چھہ شاید یہ کیاہ تام جنونی کیفیت آسان ز یم چھہِ بار بار امکانن ہند دنیاہ بدِ کڈنہ باپتھ آلو دوان روزان۔ آلو سیتۍ پیۆو یاد ز نیب آنلاین فورمک ٲخری طرحی مشاعرہ تہِ اوس آلو ردیف سے پیٹھ منعقد کرنہ آمت۔ تمہیداً یۄس کتھ میہ تُج تتھ کتھہِ چھہ اتھ مشاعرس سیتۍ جان تعلق امہ مۄکھہ کرو یۄہے مشاعرہ نظرن تل تھٲوتھ کتھ۔ بییہ چھہ از کتابو کھۄتہ سوشل میڈیا زیادہ اہم تہ پانہ تہِ چھس بہ وارہ وارہ کتابہِ ہندس غیر اہم آسنس کن مایل سپدان (وجہ کرو بییہ ساتہ بیان)۔ بہرحال غزلہ ہا آسہ واژمژہ تہ منیب صٲبنہ اجازتہ گوس بہ تہِ اتھ مشاعرس منز شریک۔ غزلہ روزہ واتان تہ فورم رود پوسٹ کران۔ بہترین کلام آو برونٹھ کن یتھ منز طالب علمن سیتۍ سیتۍ استادو تہِ پننہ شاعری ہندۍ جوہر آزماوۍ۔ اتھ دوران رودۍ قاری یمن غزلن پیٹھ پننۍ تاثرات تہِ باوان۔ جان بحث اوس چلان مگر ہنگہ منگہ ہیتن تاثراتو بدلہ فتویٰ تہ محضر نامہ پوسٹ سپدنۍ۔ میہ تۆر نہ فکری ز یہ کۄسہ عدالت لج۔ یا ز یہ کتھ ہوس سکولس چھہ امتحان چلان۔ کینہہ یار لگۍ تشریح سیتۍ سیتۍ رد و قبولکۍ اصول تہِ وضع کرنہِ۔ میہ پیۆو پنن سکول یاد ییتہ میہ پریتھ ساتہ کتابن سیتۍ بغاوت کٔر تہ تعزیر نامہ میون گرہ آیہ سوزنہ۔ میہ پییہ یاد افلاطون سنز گۄپھ ییتہ ژھاین ٲخری تہ واحد حقیقت ماننک تصور اصل الاصول چھہ۔
امہ چیزچ چھیہ نہ کانہہ شکایت ز تاثراتو بدلہ آیہ فیصلہ صادر کرنہ بلکہ چھیہ شکایت ییمہ کتھہِ ہنز ز یمن غزلن پیٹھ فتویٰ صادر گیہ تمن غزلن ہندۍ تخلیقکار رودۍ خاموش۔ تمہ سیتۍ رود یک طرفہ مکالمہ چلان تہ امی یک طرفہ مکالمن تھوو یہ مشاعرہ اڈلیوک۔
وۄنۍ یمو بدل کتھہِ کُن۔
مولانا شبلی نعمانی چھہ پننہ کتابہِ شعرالعجمس منز ابنِ رشیق نہِ حوالہ اکھ واقعہ نقل کران ز ابن الرومی اوس عربک اکھ مشہور شاعر۔ اکہ وزِ کۆر امس کمۍ تاں شخصن طنز ز ژہ چھکھ ابن المعتز سندِ کھۄتہ بۆڈ شاعر مگر تمۍ سنز ہشہ تشبیہہ چھکھ نہ ہیکان پیدہ کرتھ۔ ابن الرومین وۆننس ز ابن المعتز سند کانہہ شعر بوزنٲوو، تمۍ پۆر شعر :
فانظر الیه کزورقٍ من فضّتهٍ
قد اثقلته حمولتهٌ من عنبرٍ
یہ شعر چھہ ژندرس متعلق ز گۄڈنیک ژندر چھہ زن رۄپہ سنز ناو یتھ پیٹھ تیوت عنبر چھکھ لۆدمت ز ناو چھیہ دبیمژ۔ امہ بارہ سیتۍ چھہِ ناوِ ہندۍ نمے یٲتۍ اتھہِ یوان۔ یعنی گۄڈنکس ژندرس چھیہ ناوِ نمن سیتۍ تشبیہہ دنہ آمژ تہ شامہ اسمانس عنبرس سیتۍ۔۔
ابن الرومین یمہ ساتہ یہ بوز تس ژج کریکھ نیرتھ
لا یکلف اللہ نفساً الا وُسعھا
دۆپن ابن المعتز چھہ شہزادہ، یہ وچھمت چھن تی چھہ ونان۔ بہ کتہ انہ یم خیال۔
گویا پریتھ لیکھن وٲلس چھہ پنن اکھ ماحول میسر آسان یمیک مشاہدہ تمۍ سندس تخیلس مواد فراہم چھہ کران تہ تی چھہ امس لیکھن وٲلس اظہارک وسیلہ بنان۔ اظہارن ہندۍ نوۍ طریقہ، تشبہین تہ استعارن ہند دنیاہ کِتھہ کنہِ لبو اسۍ۔ ذہنی تجربن ہنز رنگارنگی کتہِ نیرِ ننۍ۔ امہ خاطرہ چھہ سٲنس ریوایتس منز اکھ مارۍ مۆند تہ اہم عمل، سہ گۆو طرحی مشاعرہ۔ میون ذاتی مشاہدہ چھہ یہ ز آنلاین طرحی مشاعرہ رود پتمیو کینژو وری یو پیٹھہ سیٹھاہ اہم کٲم انجام دوان ز واریاہ نوۍ تہ پر امکان لکھاری آیہ لبنہ۔ نوۍ نوۍ مباحث وۄتلیایہ مگر کٲنسہ وۄستادن کۆر نہ دعویٰ ز تمۍ سنزے کتھ چھیہ حرفِ ٲخر۔ نیب فورم رود یہ کٲم سیٹھاہ ایمانداری سان کران مگر خاموشی سان۔ سانہِ اگر کانہہ ادیب ژاکھر تہِ کرِ صبحس چھہ اخبارس آسان ز فلانۍ شاعرن کٔر بحر بسیطس منز ژاکھر۔
کشیرِ منز یم ادبکۍ قاضی القضاة تہ تمن ہندۍ ژاٹھ چھہ بہتھ تمن خاطرہ چھہ تمۍ سے ابن رشیقن حوالہ کافی یمۍ سند حوالہ تم بار بار چھہ دوان ز ادب چھہ نہ کٲنسہ پیٹھ نازل گژھان۔ تخلیقکار یتھ ثقافتس منز زوان چھہ سۄے ثقافت چھیہ تمۍ سندس باوتس بل دوان۔
بیاکھ تشویشناک کتھ چھیہ یہ ز لکھارۍ چھہ پننس لیکھۍ متس پیٹھ خاموش روزان۔ اگر کانہہ اعتراض چھہ کران یا فتویٰ صادر چھہ کران یہ لکھارۍ چھہ نہ پنن لیۆکھمت ڈیفینڈ ہیکان کرتھ۔ امہ چیزہ سیتۍ چھیہ ادبی ماحولس غلط شیچھ گژھان تہ پراگندگی چھیہ پھہلان۔ مثلاً اگر کانہہ لکھارۍ تمام وٲنسہ باوزن شاعری چھہ کران تہ اچانک چھہ تمۍ سنزِ غزلہ منز بے وزنی باسان تہ تتھ پیٹھ چھہِ اعتراض وٲرد گژھان، تس لکھٲرس پزِ پنن چیز ڈیفینڈ کرن۔ ادب چھہ نہ یوت ژمیامت ز نوین تجربن خاطرہ روزِ نہ جایی۔
مزید یہ ز ادبس منز شدت پسندی چھیہ طبقاتن زنم دوان۔ سون ادبی دنیاہ چھہ واریاہ لوکٹ۔ بولانی کاتیاہ چھہِ، تہ امہ کس ادبس کاتیاہ چھہ مازان۔ مگر اکھ کتھ یۄسہ میہ یقین کس حدس تام جذب گیہ سۄ چھیہ یہ ز سون یہ لۄکٹ ادبی دنیاہ تہِ چھہ وۄنۍ طبقن منز تقسیم گۆمت۔ اکھ ادبی بورژوا بیاکھ ادبی پرولتارۍ۔ حالانکہ کارل مارکس اوس بدل چیزن وٲتتھ مگر طبقاتی تقسیمچ جدلیات چھیہ واریاہن شعبن سیتۍ سیتۍ ادبس تہِ احاطہ کران۔ سادہ لفظن منز کرو پننہ ادبچ کتھ۔ سۄ یہ ز سٲنس ادبی منظر نامس پیٹھ چھہِ ادبی بورژوازۍ پننۍ وسایل بروے کار انتھ اکھ سہ بیانیہ قایم یژھان کرن ییتہ تمن ہند دۆپ الہامی پزر باسہِ۔
امہ طبقک طریقہ کار چھہ علمک (سہ تہِ جعلی) رعب تراون تہ لکن ہند زاویہ نظر تہ سوچن تراے بدلاون۔ کینہہ فرسودہ اصول حکمِ خداوندی ہندس درجس تام واتناونۍ تہ تمنے تحت لیکھن ہنز شعریات تہ جمالیات طے کرنۍ۔ اتھ طبقس چھیہ آسان بڈین ادبی پلیٹ فارمن تام رسایی ییتہ یم پننہِ ترجیحات ادبی ترجیحات بناونہ خاطرہ سرگرداں چھہِ روزان تہ یتھوے پلیٹ فارمو پیٹھہ چھہ یہ طبقہ ادبس متعلق عمومی راے تشکیل دیاوان یۄسہ دراصل اہندس ظنس ویہ ونۍ چھیہ آسان۔
امہ تقسیمہ سیتۍ کیاہ نقصان چھہ سٲنس ادبس۔ زیادہ زاوۍ جارس منز وسو نہ کینہہ ویچھہ پوچھہ کتھہ ونو۔ ساروے کھۄتہ اہم یہ ز یمہ آوازہ حاشیس پیٹھ چھیہ تمن منز امکانات ژھانڈنکۍ موقعہ چھہِ معدوم سپدان۔ بیاکھ یہ ز اظہارن منز تنوع ییمہِ سیتۍ قاری یس مختلف انسانی تجربن تانۍ رسایی میلہِ ہے چھہ وارہ وارہ ختم سپدان۔ مزید یہ ز ییمہ ساتہ ادبی پرولتارِس یہ تقسیم ٹھۆر چھہ انان، ادبس منز چھہ اکہ قسمک ٹھہراو یوان۔ اکھ بور کرن واجنۍ یک رنگی چھیہ پیدہ سپدان۔ تخلیقن منز چھہ نویر راوان تہ بار بار چھہ اکے قسمک مواد برونٹھ کن یوان۔ امہ علاوہ چھیہ بیاکھ کتھ سمجھنچ یہ ز بیانیہ ہن پیٹھ چھیہ اجارہ داری قایم سپدان۔ اکے قسمک تنقیدی شعور چھہ پریتھان۔
یہ پز یاد تھاون ز ادبس منز امہ قسمچ حرکیات چھیہ حاشیس پیٹھ بہتھ ادبی پرولتارین ہنز شمولیت لگ بھگ ناممکن بناوان۔
اتھ عدم مساواتس تہ اتھ تقسیمس پیٹھ باسیوو میہ ساتہ ساتہ نیب فورم توجہ مرکوز کران۔ لۄکٹس مۄکٹس سطحسے پیٹھ سہی مگر کوشش کٔرن ز ساری لکھارۍ گژھن شامل گژھنۍ۔ امۍ فورمن کٔر وز وز کوشش ز لکھارۍ گژھۍ نہ تتھ افلاطونی غارس منز اژنۍ ییتہ محض ژھایہ انسانی سوچس تہ تخیلس محدود چھہ کران۔ بلکہ کٔرن کوشش ز لیکھن والۍ گژھۍ سپدنۍ تتھ لامحدود دنیاہس سیتۍ وابستہ ییتہ پریتھ ساتہ نوۍ امکان زاین چھہِ لبان۔ اتھ کوششہ منز اگر لکھارۍ تہ قاری (نہ ز ادبی قاضۍ) شامل گژھن تیلہ پکہ سانہِ ادبک دریاو روانی سان۔
نتہ چھیہ خبر ز پریتھ مشاعرہ آسہِ اڈلیوک مشاعرہ۔
