فیاض دلبر سنزِ زیر طباعت کتابہِ کافی ہاوس منزہ اقتباس
ژیہ کۆرمت ٹھاکھ کمۍ اوسے ؟
1970کِس دہلس منز ٲس اکھ معروف کاشر خوتون ماہر تعلیم سرینگرس منز سرگرم۔ سماجس منز ٲسس پریزنتھ تہ اکھ رتبہ حاصل۔ مردن لرِ لۄر زندگی گزارنک جنون تہِ اوسس تہ بتر تہِ۔ امِس اوس بنارسی پان کھینک سخ شوق لہذا ٲس پریتھ دۄہہ ریگل چوک یِتھ میر صٲبس نِش پان کھیوان تہ بعضے تہندس وانس نِش اۆڈ گھنٹاہ وۄدنہِ روزتھ سنجیدگی سان مقامی، ملکی تہ عالمی سیاسی تہ سماجی حالات و واقعاتن پیٹھ تبصر تہِ کران۔ امس اوس یہ تہِ پتاہ ز میر پان ہاوس پیٹھہ محض تریہ قدم دور چھہ سڑکہِ اپارِ دچھنۍ کنۍ کافی ہاوس مگر یہ کھژ نہ امچہ ہیرِ زنہے، ظاہر نہ اوہ کنۍ تکیاز امس اوس کافی ہاوس منز خاوند تہِ بیہان۔ مام، پِتر بوے، ماستُر بوے نتہ کانہہ ہمسایہ تہِ ما آسہس اور یوان۔ از ییلہ میہ سۄ ژیتس پیہ، میہ پیۆو یہ تہ حیس ز میہ چھیہ نہ پننہ وٲنسہ زنہے کانہہ کٲشر کور یا زنانہ کافی ہاوس کھسان وچھمژ۔ سۄ تہِ نہ یۄسہ سماجی طور سرگرم ٲس، سۄ تہِ نہ یۄس پرانہِ پوژِ ہندۍ لوکھ نیبر دراو ونان ٲسۍ۔ ڈاکٹر نہ، وکیل نہ، ٹیلی وجن، اسٹیج یا ریڈیو ڈراماہن منز کٲم کرن واجینۍ آرٹسٹ نہ، آرٹ کالجس منز کنین مورژہ گرن واجینۍ مجسمہ ساز نہ ، بیہ خوف پاٹھین بیہ باک قسمکۍ کاشر افسانہ لیکھن واجینۍ تہ نہ، کالجس یا یونیورسٹی منز پرن واجینۍ کانہہ کور نہ، حتی کہ الیکشن موسمس منز لوکہ ساسس برونہہ کنِہ تقریر کرن واجنہِ کُنہِ تہِ سیاسی جماژ ہنز کانہہ لیڈر یا کارکن تہِ نہ۔ یمن سارنی زنتہ ٲس غیبی آواز کنن گمژ ز سرینگرک انڈیا کافی ہاوس چھہ صرف مردن مہرہ کھۆتمت۔ حالانکہ اتیک ماحول اوس نہ تیوتھ تِہ یتھ غیر شایستہ ونو۔ اتہِ بیہن وال ۍٲسۍ نہ بول چالس منز تژھ کانہہ بازرۍ زبان تہِ ورتاوان یۄسہ شریف زنانن کنن تھۆپ دنس مجبور کرِ ہا۔ بہرحال میہ چھیہ نہ پننہ وانسہ کانہہ کاشِر زنانہ کافی ہاوس یوان وچھمژ، البتہ چھم بوزمت ز مولانا آزاد روڈ سرینگر کہ کالج آف ایجوکیشنچ (یتھ تیلہ بی ایڈ کالج ونان ٲسۍ) کۄستام لیکچرار بٹہ کور چھیہ کنوہ شتھ تہ ستتھس منز ریتھ جوراہ پننین کالج ساتھی ین سیتۍ اور یوان ٲسمژ ۔ دۄیہ ریتہ پتہ آسنکھ تس پر کترۍ متۍ ۔ اتھ زمانس آس پاس آسہ کشیرِ منز مقیم کینہہ غیر کاشرِ زنانہ منز منزہ کافی ہاوس ضرور یوان یمن منز کشمیر یونیورسٹی ہندِ شعبہ انگریزی کس سربراہ ڈاکٹر جے رمن سنز گھرہ واجینۍ وجے لکشمی تہِ ٲس یۄس تمہ زمانہ کس کافی ہاوس منیجر مسٹر لال سنزِ آشنہ سیتۍ ویسہ تون اوس۔ یمن ہریمانہ ٲس کنہِ وز سمیترا یوان۔ سمیترا جی گییہ سینیر جرنلسٹ پی این جلالی سنز خاندارینۍ یہ ٲس وومینز کالج مولانا آزاد روڈ لایبریرین، اصلی بنگالۍ تہ کافی ہاوس ٲس ہمیشہ جلال صٲبسے سیتی یوان۔
مسٹر اینڈ مسز پریکو کافی ہاوس ینہ واجنین غیر کٲشرین زنانن منز ٲس مسز پریکو، یس اصل ناو آرو سونی اوس، واحد زنانہ یۄسہ کافی ہاوس لگ بھگ دۄہے کھسان ٲس۔ امس اوس اکثر خاوند مسٹر پریکو اصلی نا پرکاش سونی سیتۍ آسان۔ دراصل اوس یمن کافی ہاوسس بۄنہ کنہِ فوٹو گرافی ہند سٹیڈیو تتھ اوس پریکو ناو۔ پریکو سٹیڈیوز۔ یہ پریکو ناو اوس یوتاہ مشہور گۆمت ز لوکھ ٲسۍ یمن بٲژن دۄن مسٹر تہ مسز پریکو ناوہ سیتی زانان۔ یہندۍ اصل ناو ٲسۍ کانسہِ کانسہِ معلوم، یمن ما آسہن پننۍ اصل ناو پانس تہِ منزۍ منزی ژیتس پیوان۔ مسٹر پریکو (پرکاش سونی) اوس سٹیڈیو فوٹو گرافی باپت سیٹھہے مشہور۔ یہندِ اتھکۍ کینہہ بلیک اینڈ وایٹ تہ رنگین فوٹو گراف چھہِ از تہِ کینژن سرکارۍ تہ نیم سرکارۍ ادارن ہنزن عمارژن زینت بخشان۔ واریاہن کاشرین چھیہ پننی بزرگن ہندۍ پریکو سٹیڈیوس منز تلنہ آمتۍ پوٹریٹ از تہِ گھرن منز موجود۔
