نوۍ تقاضہ تہ رد ادب — کاشرِ کانفرنسہ پیٹھ اکھ تبصرہ
شاہد دلنوی (تبصرہ نگار) —
کاشرِ کانفرنسہ ہندِ گۄڈنکہ دوہہ کس پینل ڈسکشنس منز ٲسۍ سوہن لال کول صاب مدعو کرنہ آمتۍ تہ بحث اوس کاشرِ ناولہ کس صورت حالس متعلق۔ میہ چھہ نہ از تام کنہِ پروگرامس منز یم نظرِ گمتۍ۔ یمن چھہِ ادبکہ حوالہ پننۍ کینہہ تحفظات تہ مفروضہ تتھ ہیکو نہ انکار کٔرتھ تکیاز پریتھ کانسہ چھیہ پننہِ آیہ سوچنچ آزادی۔ یہندِ سوچہ مطابق یم تہِ ناول ونیک تام کاشرس ادبس ونہِ چھہِ آمتۍ تم ساری چھہِ فرسودہ خیال تہ تمن اندر چھہِ نہ صنفی معاملات نظرِ تل تھٲوتھ زو زیتے موجود ز تمن ییہ کانہہ اہمیت دنہ۔ توے چھہِ یم ونان ز یہ پتھ کن لیکھنہ آو تہِ سورے پزِ اسہ رد کرن تہ نوِ زمانکۍ نٔوی تقاضہ نظرِ تل تھٲوتھ نۆو ادب انٹروڈیوس کرن۔
سوہن لال کول صابن تعارف گۆو پتمہ وری کینژن وٹس ایپ گروپن ہندِ وساطتہ۔ تمہ برونہہ اوس میانہ خاطرہ یہند تعارف یتے ز یم چھہِ دور درشنس اندر پروڈیوسر ٲسمتۍ تہ یہنز ادبی کٲم تہِ ٲس ژھایہ ژھایے۔ کشیرِ ہندین واریاہن ادیبن ما آسہ ہے خبر سۄ چھیہ الگ کتھ۔ میہ ننیوو اتھۍ پینل ڈسکشنس منز ز یمو چھہِ اکھ درجن کھوتہ زیادہ ناول لیکھمتۍ، تہ امہ علاوہ کینہہ ڈراما تہِ تحریر کرمتۍ۔
اکھ درجن کھوتہ زیادہ ناول لیکھنۍ چھیہ نہ گفہ کتھ۔ یہ پییہ بہر حال تسلیم کرن۔ سانیو پیش روو لیکھۍ پورہ زندگی منز مرحوم غلام نبی گوہرس وراے اکھ یا زہ زہ ناول تہ بیٹھۍ تھکس تہ تہند سہ تھکھ ووت نہ اندے زانہہ۔
یمن ادبی آن لاین گروپن سیتۍ سوہن کول صابنۍ وابستگی ٲس تمن اندر ٲسۍ اکثر یہندۍ ریکارڈ کرمتۍ پیغامات نشر کرنہ یوان۔ پریتھ پیغامس منز اوس یہند زور نوِ پیہ ہندین ادیبن، شاعرن تہ کاشرِ زبانۍ سیتۍ وابستہ طالب علمن یہ آسان ز اسۍ کیتس کالس روزو آویزگی ہندین سرحدن ہنز تریش چیوان۔ یہ کینژھا پتھ کن لیکھنہ آو تہِ سورے چھہ آوٹ آف ڈیٹ گومت تہ تتھ چھیہ نہ نوِ دورچ نوۍ تقاضہ وچھتھ کانہہ اہمیت تہ افادیت روزمژ۔
یمن پیغامن اوس تیتھ نون مرژوانگن متھتھ آسان ز بوزن وول ادیب یا شاعر اوس سوچان ز بزرگ ادیبو تہ دانشورو چھیہ میانۍ سارے پراپرٹی پننہِ ناوہ کرمژ تہ میانہ خاطرہ چھہ نہ امہ رۆس چارے ز بہ کرہ گۄڈہ انوارِ پنن احتجاج درج۔ پزر چھہ یہ ز سوہن کول صابس چھیہ زبان سیٹھہے مدر یمہ کنۍ یہنزہ کتھہ نہ صرف اثر کران چھیہ بلکہ چھیہ کانہہ خوفناک قدم تلنک یا کم سے کم احتجاج کرنہ خاطرہ ادیبن ہندس اکس خاص طبقس وتش تہِ دوان۔
یم پیغام بوزتھ اوسس بہ تہِ واراہ متاثر گژھان یمس ادبہ کس خارزارس منز وۄنۍ ترہہ دۄیہ ترہہ وری ژھرٹھ دواں گیہ تہ سوچان اوسس ز کنہِ دوہہ کھسہ بہ تہِ شہرس کن تہ لال چوکس منز لاگہ کریکھ ز میون حق کھینہ والیو خداے ژھنہ نو تاون۔
مگر پتہ اوسس سوچان میہ ما تراون پننہ فرقکۍ لکھ اسن ز باورہ چھکھ گومت۔ ٲخر استعداد چھیہ کانہہ کتھا آسان۔
کول صابنۍ یم پیغام رودۍ واریاہس کالس گردش کران تہ پتہ گیہ سۄکھہ مۄکھہ بند۔
خیر، کتھ ٲس چلان کٲشرِ “دو روزہ کانفرنسچ”۔ یتھہ کنۍ میہ گۄڈے عرض کۆر ز کول صاب وچھ میہ گۄڈنچہ لٹہِ مدعو ادیبن اندر۔ امہ علاوہ ٲسۍ کم و بیش کاشرِ ایڈوایزری کمیٹی ہندۍ ساری بورڈ ممبر بشمول کنوینر اتھ کانفرنسہ اندر شرکت کران۔ میہ دۆپ یہ چھہ سہ گۄڈنیک پڑاو یس کول صابن طے کۆر یعنی یہندِ خاطرہ گیہ دروازہ یلہ۔ یمن ییلہ پننۍ تاثرات پیش کرنہ باپت وننہ آو یمو وۆن تی یہ یہندین وٹس ایپ پیغامن ہند لب لباب آسان اوس ز ونیک تام لیکھنہ آمت سورے ادب گژھہِ رد کرنہ ین تکیاز یہ چھہ نہ سہ خلاء یا ویکیوم پروِتھ ہیکان یس ویکیوم ازۍ کس ادیبس درپیش چھہ۔
یہندس اتھ خیالس سیتۍ کۆر ہالس اندر موجود بیشتر ادیبو تہ دانشورو اختلاف۔ مثالہ پاٹھۍ رتن لال تلاشی صابن وۆن ز یہ چھہ نہ ممکن ز اسۍ کرو ونیک تام لیکھنہ آمتس ادبی سرمایس کن تھر، تکیاز یہ چھہ سہ گاشہ منار ییمک گاش اسہ نوِ وتہ مشخص کرنس اندر اتھہ روٹ کران چھہ۔
شکیل الرحمن صابن وۆن ونیک تام لیکھنہ آمت ادب رد کرن گۆو کانہہ کلس کھٲلتھ تس ہیر کڈتھ ننۍ۔ تہِ کِتھہ چھہ ممکن تہ اتھ درجواب وۆن کول صابن ز یس کلس کھۆت تس کیاہ ضرورت چھہ بۄن وسنک۔ سہ کھییہ تن کلس پیٹھ کھستھ میوہ۔ بۄن وسنک کیا حاجتھ چھس۔
المختصر، اتھ دوران سپد کول صابنین ناولن ہند تذکرہ ز یمو کیژہ ناولہ چھیہ لیچھمژہ تہ مواد تہ موضوع رنگۍ کتھ حدس تام چھیہ یم لگہار تہ ازۍ کس انسان سند کرب ویژھناوان۔ بہ چھس کاشرِ ادبہ کس قاری یس تہ خاص کر نقادن پرژھن یژھان ز تمن کیا راے چھیہ اتھ بارس منز؟ ساہتیہ اکادمی ہندِ بورڈ کین باقی ممبرن ہند کیا خیال چھہ؟
بقول منیب الرحمن ادبکۍ نوۍ تقاضہ گۆو ٹھیک مگر کنہِ زبانۍ منز لیکھنہ آمت ادب ہیکون نہ یتھہ کنۍ رد کٔرتھ، خاص کر کاشریک یمیک اکھ سۄنہرۍ دور پتمہِ صدی ہندین گۄڈنکین شیٹھن ستتھن وری ین سیتۍ وابستہ چھہ۔
