دہلی ایکسایز کیس: سی بی آئی پتہ دژ ای ڈی ین سسودیاہس کلین چٹ ۔۔ کیجریوال
نٹرل بیورو آف انویسٹی گیشن (سی بی آئی) ہندِ طرفہ دہلی ایکسائز پالیسی کیسس منز گۅڈنیک چارج شیٹ داخل کرنہ کہ اکہ دۅہہ پتہ، انفورسمنٹ ڈائریکٹوریٹن (ای ڈی) کٔر بٹہ وارِ راؤس ایونیو کورٹس منز اتھ کیسس متعلق پراسیکیوشن شکایت درج۔
3000 صفحن پیٹھ مشتمل ای ڈی کس چارج شیٹس منز چھہ تاجر سمیر مہندرو سند ناو۔
الزام چھہ ز حیدرآباد کۍ کوکاپیٹکۍ روزن والۍ ارون رام چندر پلائی ٱسۍ مہیندروس نش ناجائز فایدہ رٹان تاکہ سہ ہیکہِ تتھ ملزم سرکاری ملازمینن وجے نایر سندِ ذریعہ برونہہ کن منتقل کرتھ۔
ای ڈی یک معاملہ چھہ سی بی آیی کہ طرفہ دایر کرنہ آمتس ایف آیی آرس پیٹھ مبنی۔
ای ڈی کس چارج شیٹس منز چھہ نہ ڈپٹی چیف منسٹر منیش سسودیا سندِ ناوک کانہہ ذکر۔
ای ڈی کس چارج شیٹس پیٹھ ردعمل ظاہر کران وۆن، دلہِ ہندۍ وزیر اعلی اروند کیجریوالن اکس ٹویٹس منز ، “سی بی آیی پتہ چھیہ، ای ڈی ین منیش سسودیاہس کلین چٹ دژمژ۔ کیا پی ایم مودی یس پزِ نا تعلیمی انقلاب کہ ذریعہ ہندوستان دنیاہس منز مشہور کرن والس شخص منیش سسودیاہس اپزس کیسس منز پھساونہ خاطرہ ملکس معافی منگنۍ؟