ساینس تہ ٹکنالجی

شمسی خلا نیبر ،بین الشمسی خلاہس منز ووت ووییجر 1

اکہ تازہ مطالعہ مطابق دراو پتمہ وریہ 25 اگست ووییجر 1 پلازما یعنی پارٹیکلن ہندِ تمہ وسیع دایرہ نیبر یُس آفتابس تہ سیارن اندۍ اندۍ چھہ۔ یہ چھہ انسانی تواریخس منز گۅڈنچہ لٹہِ ییلہ امۍ سند بنوومت کانہہ مصنوع شمسی نظام کہ خلا نیبر رسایی حاصل کٔرتھ ہیوٚک۔

تقریبا اکس وریس پلازما ہس متعلق مزید معلومات تہ فیصلہ کن شواہد حاصل کرنہ خاطرہ انتظار کٔرتھ کوٚر وابستہ ساینس دانو حال حالے یہ فیصلہ زِ ووییجر 1 چھہ پزۍ پاٹھۍ شمسی نظام کیو حدو نیرتھ خلا کس تتھ علاقس منز ووتمت یتھ بین الشمسی یعنی سرۍ ین درمیانک خلا ونو۔

یہ فیصلہ کرُن اوس امہ کنۍ مشکل بنیوومت بلکہ چھہ ونہِ کینژن ساینس دانن ہنزِ نظرِ منز مشکوک تکیازِ 1980 تس منز اوس امیک پلازما آلہ خراب گومت یُس پلازماہک گنیر، تژر تہ رفتارچ پیمایش کران چھہ۔ بین الشمسی خلاہس منز چھہ سہ پلازما غالب یُس لچھہ بدۍ وری برونہہ بڈین نزدیکی سرۍ ین ہندس ختم گژھنس سیتۍ چھکرنہ آو۔ سٲنس شمسی دٲیرس منز چھہ آفتاب کہ دسۍ نارہ ژنجین ہندس صورتس منز چھکنہ ینہ وول پلازما غالب۔ سون شمسی نظام چھہ پلازما کس اتھۍ دایرس منز یتھ ہیلیو سپھیر ونان چھہِ۔ یہ پلازما چھہ ہیلیو سپھیر کس حدس پیٹھ تنان۔ امیک احساس اوس پتمس دہلس دوران ساینس دانن گوٚمت ییلہ ووییجر 1 شیٹھ ساس پیٹھۍ کلو میٹر فی گھنٹہ دوران اوس۔

یہ طے کرنس منز چھہ پلازما اہم آیا ووییجر 1 چھا شمسی دایرس اندر (یتھ منز پلازما آفتابہ پیٹھہ نیبر کن ژھٹنہ یوان چھہ) کنہ بین الشمسی خلاہس منز یتھ منز لچھہ بدۍ وری برونہہ  بڈین سرۍین ہندِ دھماکہ سیتۍ پریتھ اندس کن پلازما چھکنہ آمت چھہ۔ کینژن ساینس دانن ہند ونن چھہ زِ یہ وننہ برونہہ زِ اسۍ چھا بین الشمسی خلاہس منز  پزِ اسہِ دۅن ترین ورین ہند  انتظار کرُن یوت تام ووییجر 2 اتھ مقامس پیٹھ واتہِ۔ ووییجر 2 ہک پلازما پیمایشی آلہ چھہ ٹھیک پاٹھۍ کٲم کران۔

ووییجر 1 تہ ووییجر 2 آیہ 1977 اندر خلاہس منز بنیادی طور دور دراز سیارہ متعلق تحقیق کرنہ کہ مقصدہ سوزنہ، مگر امہ مشنہ کس عملس اوس پورہ یقین ز ِیم دۅشوے درن شمسی نظام کس حدس واتنس تام۔ 36 وری پیٹھۍ جوپیٹر (5 مارچ 1979)، سیٹرن (12 نومبر 1980) تہ یورانس تہ نیپچون (1989) کنۍ پرواز کٔرتھ 18 بلین زیادہ کلو میٹرک منزلہ طے کٔرتھ کھول ووییجر 1 پروبن انسان سندِ خاطرہ گۅڈنچہ لٹہِ بین الشمسی خلا۔ ساینس دان چھہِ توقع کران زِ ووییجر 1ککۍ فیلڈ تہ پارٹکل آلہ روزن 2020 تام کٲم کران یوت تام یمن ہند الیکٹریکل پاور پوشہِ، تمہ پتہ ین امکۍ ساری آلہ اکہ اکہ بند کرنہ تہ 2025 تام آسن ساری آلہ بند کرنہ آمتۍ تہ ووییجر 1 روزِ اکس خاموش سفیر سندۍ پاٹھۍ خلاہن اندر پرواز کران۔

ووییجر 1 کس نیبرمس خولس پیٹھ چھہ سۅنہ لٲگتھ ترامک اکھ ڈسک، سژن تہ چلاونکۍ ہدایات ہیتھ۔ اتھ ڈسکس پیٹھ چھیہ زمینہِ ہنزِ فطری آوازہ مثلا واو، بارش، بیترِ، نمتھن منٹن ہنز موسیقی صدابند؛ امہ مزید 115 تصویرہ تہ 60 ٹھن زبانن منز  کاینات کہ خاطرہ سلام و دعا تہ امنکۍ پیغام شامل۔ یم چیز چھہِ کلہم پاٹھۍ زمینہِ پیٹھ چہ زندگی تہ تہذیبک تنوع درشاوان۔

وری 2012 کہ نصفس دوران ژیون ساینس دانو زِ ووییجر 1 چھہ خلا کس اکس نٔوس علاقس اندر ژامت۔ یہ کتھہ پاٹھۍ ژیون یمو؟

افتابہ کہ طرفہ نیبر کن ژھٹنہ ینہ والین سب اٹامک پارٹیکلن (شمسی نارہ ژنجہ) ہند سلسلہ چھہ نیپچیون گژھتھ نیبر کن پھہلان یوت تام یہ سلسلہ تمن پارٹیکلن بتھہِ لگان چھہ یم آفتابن ردمیان (بین الشمسی) موجود چھہِ۔ شمسی پارٹیکلن ہند سلسلہ چھہ بین الشمسی پارٹیکلن ژیل دتھ پنن زور خرچ کران۔ وارہ وارہ چھہ یہ سلسلہ یوتاہ کمزور گژھان زِ یہ چھہ نہ ہیکان مزید ژیل دتھ تہ یہ چھہ اتھ مقامس پیٹھ ٹھہران۔ اتھ علاقس چھہِ ہیلیو پاز ونان۔ واریاہن ورین اوس یہ ژیننہ آمت ژِ ووییجر1 چھہ پارٹیکلن ہندِ گنیرہ منزہ نیرتھ خلا کس سوٚتس علاقس منز پرواز کران ییتہِ نس ہیلیو پاز چھہ۔ مگر یہ ونن اوس مشکل زِ یہ دراوا امہ علاقہ نیبر کنہ نہ۔ چونکہ پلازما آلہ اوس گۅڈے خراب، لہذا کوٚر ساینس دانو پلازما بدلہ میگنیٹک فیلڈ کس رۅخس پیٹھ توجہ۔ شمسی پلازما چھہ پانس سیتۍ میگنیٹک فیلڈکۍ صفحہ پکناوان یم سرۍ یہ پیٹھہ نیبر کن پکان چھہِ۔ بین الشمسی پلازما چھہ پانس سیتۍ  بین الشمسی میگنیٹک صفحہ پکناوان۔ ساینس دان چھہِ یمن دۅشونی میگنیٹک فیلڈن ہندۍ رۅخ مختلف آسنکۍ توقع کران۔ امہ کنۍ چھہ یہ توقع کرنہ یوان زِ ییلہ ووییجر1 شمسی دٲیرہ منزہ نیبر نیرتھ بین الشمسی خلاہس منز داخل گژھہِ میگنیٹک فیلڈ کس رۅخس منز سپدِ تبدیلی۔ ساینس دانن ہندِ مطابق گژھہِ امہ مزید شمسی پارٹیکلن منز تہِ کمی واقع یتھ کن پیٹھہ کنہِ اشارہ سپد۔ جلے 2012 منز سپزہ یمہ تبدیلی واقع تہ یہ آو ژیننہ زِ ووییجر1 چھہ بین الشمسی خلا چہ دندرِ تام ووتمت۔ 25 اگست تام اوس یہ اتھ نٔوس علاقس منز ژامت تکیازِ تمام اندرونی کمزور پارٹیکلن ہند سطح گوو سیٹھا سیٹھا کم تہ اتھ برعکس گوو کاسمک ریزن ہندس سطحس منز ڈرامایی ہریر۔ (م۔ر)

Leave a Reply

Back to top button
%d bloggers like this: